ՀՀ ՊԵԿ նախկին նախագահ Գագիկ Խաչատրյանի որդու՝ Արտյոմ Խաչատրյանի և եղբորոորդու՝ Արամ Խաչատրյանի նկատմամբ որպես խափանման միջոց է կիրառվել կալանքը, Armenia Today-ին հայտնել են դատախազությունից։
Ըստ գերատեսչության՝ Հակակոռուպցիոն դատարանը բավարարել է դատախազի կողմից ներկայացված միջնորդությունները, իսկ նրանց նկատմամբ կիրառված 200 մլն դրամ գրավը դարձել է պետության եկամուտ։
Փաստաբան Երեմ Սարգսյանը լրագրողներին հայտնել է, որ Խաչատրյաններն առողջական խնդիրներից ելնելով դատական նիստին չեն ներկայացել, և մեղադրողը միջնորդել է խափանման միջոց գրավը փոխարինել կալանքով։
«Օրենքով նշվում է, որ, եթե անձը հարգելի պատճառով չի ներկայացել դատական նիստին, խափանման միջոցը չի կարող փոխվել։ Ներկայացրել ենք բժշկական փաստաթղթեր, որտեղ նշված է, որ նրանց արգելված է թռիչքը որոշակի ժամկետով»,- ասել է նա։
Սարգսյանը հավելել է, որ 2 տարի դատական նիստեր են ընթացել, և նրանք մշտապես պատշաճ ներկայացել են։ Փաստաբանը հավելել է, որ որոշումը կբողոքարկեն։
Արտյոմ Խաչատրյանի նկատմամբ հունիսի 12-ին հետախուզում էր հայտարարվել՝ Բրյուսովի համալսարանին պատկանող՝ 208,9 մլն դրամ արժողությամբ գույքի օտարման գործով։
