Իսրայելի կողմից Հայոց ցեղասպանության հնարավոր ճանաչումը չի ազատում այդ երկրին պատմական պատասխանատվությունից, այդ թվում՝ Արցախի հայության դեմ կատարված հանցագործություններին մեղսակցության հարցում, հայտարարել է ՀՅԴ Հայ դատի կենտրոնական խորհուրդը։
ՀՅԴ-ն նաև ընդգծել է, որ եթե նախաձեռնությունը հասնի տրամաբանական ավարտին, և Իսրայելի խորհրդարանը Հայոց ցեղասպանության ճանաչումը հաստատի որպես պետական դիրքորոշում, կառույցը կողջունի այդ քայլը։
Հայ դատի կենտրոնական խորհուրդը հիշեցրել է Իսրայելի արտգործնախարար Գիդեոն Սաարի հայտարարությունը, որ «երբեք ուշ չէ ճիշտ բան անելու համար»։ Կառույցը նշել է, որ Հայոց ցեղասպանության տարիներին բազմաթիվ հրեաներ ականատես էին, իսկ հետագայում՝ հրեա մտավորականներ, քաղաքական գործիչներ և «Մերեց» կուսակցությունը պահանջել էին Իսրայելի կողմից Հայոց ցեղասպանության ճանաչումը։
Հայտարարության մեջ նշվում է նաև, որ Հայոց ցեղասպանությունը ճանաչած Իսրայելից ակնկալվում է պատասխանատվություն՝ ցեղասպանության հիշողության պահպանմանն աջակցելու և դրա ժխտման դեմ պայքարելու հարցում։
Իսրայելի կառավարությունը հունիսի 28-ին միաձայն կողմ էր քվեարկել Հայոց ցեղասպանության պաշտոնական ճանաչման բանաձևի նախագծին։ Ավելի ուշ Թուրքիան «չարամիտ» էր անվանել Հայոց ցեղասպանությունը ճանաչելու Իսրայելի քայլը, նախաձեռնությունը վերանայելու կոչ էր արել նաև Ադրբեջանը։
Նախաձեռնությունը ներկայացվել էր Իսրայելի և Թուրքիայի միջև սրված հարաբերությունների ֆոնին։ Գազայի պատերազմի մեկնարկից հետո Անկարան խիստ քննադատում է Իսրայելի գործողությունները, իսկ Թուրքիայի նախագահ Ռեջեփ Թայիփ Էրդողանը պարբերաբար կոշտ հայտարարություններով է հանդես գալիս Իսրայելի ղեկավարության հասցեին։
