«Նոր ուժ» կուսակցության վարչապետի թեկնածու Հայկ Մարությանը քննադատել է ակտիվիստ Արթուր Օսիպյանի կալանավորումը։ Նա այս մասին հայտարարել է՝ պատասխանելով Armenia Today լրատվական կայքի հարցին, թե արդյոք իրենց կուսակցության շարքերից ձերբակալվածներ կան, և խնդրանքին՝ գնահատել վերջին օրերի տոտալ ձերբակալությունները։
Նա ընդգծել է, որ կալանավորման համար հիմքեր չեն եղել, և հավելել, որ Օսիպյանը քաղբանտարկյալ է։ «Նման անհիմն կալանքներ չեմ հիշում անգամ նախկին իշխանությունների օրոք»,- հայտարարել է նա։
Մարությանը Օսիպյանին առողջություն է մաղթել և ափսոսանք հայտնել, որ մարդկանց բանտարկում են խոսքի ազատության համար։
«Նախ ուշադիր հետևում ենք․․․ Ուզում եմ ասել Արթուր Օսիպյանի մասին․ քաղբանտարկյալ Արթուր Օսիպյանն ուղղակի իր ուղիղ խոսքի, հասարակ, նորմալ բանավեճի համար այսօր բանտում է։ Ուզում եմ իրեն առոջություն մաղթել, քանի որ հացադուլ է հայտարարել։ Սա աննախադեպ իրողություն է անգամ նախկին իշխանությունների ժամանակ»,- ասել է Մարությանը։
Թեկնածուի խոսքով՝ հին բարքերից ազատվելու և նոր պետություն ստեղծելու փոխարեն, ԱԺ-ում քվեարկում են դեպի ԵՄ գնալու օգտին, բայց գործողությունները հեռու են ԵՄ-ից, մարդու իրավունքների պաշտպանությունից, արդարադատությունից։
Մարությանն ուշադրություն է հրավիրել նաև որոշ ընտրատեղամասերի տեղափոխման փաստին՝ շեշտելով, որ իշխանությունները քաղաքացիներին չեն իրազեկել այդ մասին։
«Չեն զգուշացնում, չեն իրազեկում, և իրենց բնականաբար ձեռք է տալիս, որ մասնակցությունը քիչ լինի, որովհետև իրենք ունեն հստակ ձայներ, որոնք իրենք էսպես թե այդպես ստիպելու են, տարբեր վարչական ռեսուրս օգտագործել, որ մարդիկ գնան ընտրության»,- մեկնաբանել է Մարությանը։
Օսիպյանն Արաբկիրում Փաշինյանին մեղադրել էր «ղարաբաղյան կլանին միլիարդներով սնելու մեջ»։ Քաղաքական գործիչը նաև պնդել էր, թե Փաշինյանը տեղյակ էր Արցախի նախկին նախագահ Արայիկ Հարությունյանի կողմից բաժանվող ընտրակաշառքների մասին, սակայն, չնայած դրան, աջակցել էր նրան։
Միջադեպի ընթացքում վարչապետը դիմել էր Օսիպյանին՝ հետևյալ խոսքերով. «Գնայիր, զոհվեիր, դու խի՞ ես կենդանի, ռադդ քաշի, համբալի մեկը»։ Հայաստանի ղեկավարը նաև հավելել էր. «Ծպտուններդ դուրս չգա, վե՛ր ընկեք տեղներդ, թալանչի՛ անասուններ»։ Օսիպյանին նույն օրը ձերբակալել էին, կալանավորել մայիսի 21-ին, որից հետո նա հացադուլ էր հայտարարել։
ՀՀ խորհրդարանական ընտրություններն անցկացվում են հունիսի 7-ին՝ ժամը 8:00-ից մինչև 20:00-ը: ԿԸՀ-ի տվյալներով՝ բացվել է 2005 ընտրատեղամաս, այդ թվում՝ ինը քրեակատարողական հիմնարկներում: Ընտրություններին մասնակցում է 18 քաղաքական ուժ՝ 16 կուսակցություն և 2 դաշինք, որոնց քվեարկելու իրավունք ունի 2 505 102 քաղաքացի: Գործընթացին հետևում է 13 տեղական և 8 միջազգային առաքելություններ, ինչպես նաև դիվանագիտական առաքելությունների և օտարերկրյա ընտրական մարմինների ներկայացուցիչներ:
1758 ընտրատեղամասերում տեղադրվել են տեսախցիկներ, իսկ էլեկտրոնային ընտրողների գրանցման համար օգտագործվում է 4000 տեխնիկական սարք:
