ՀՀ նախկին նախագահ Սերժ Սարգսյանն իր հրաժարականի ութամյակի կապակցությամբ հղած ուղերձում հայտարարել է, որ 2018-ին «սխալ էր»՝ լինելով ճիշտ:
«Իմ ամենաճիշտ և դժվար որոշումն «իմ իսկ խոստումը դրժելն» ու 2018թ. վարչապետի պաշտոնում առաջադրվելն էր: Ցավոք, դա նաև իմ ամենամեծ սխալն էր, որովհետև չստացվեց բացատրել մեր ժողովրդին, որ իմ առաջադրման նպատակը բնավ իշխանությունը պահելը չէր, այլ Ղարաբաղի և Հայաստանի անվտանգությունն ապահովելն էր։ Այո՛, Նիկոլը ճիշտ էր, նա պատրաստ էր գնալ մինչև վերջ և չուներ ոչ մի կարմիր գիծ, ես չպետք է առաջադրվեի»,- գրել է նա։
ՀՀԿ առաջնորդը շեշտել է՝ 2018-ին սխալվեց՝ կարծելով, թե կարողանալու են ժողովրդին բացատրել, որ բանակցային բարդ իրավիճակում իր հեռանալը հանգեցնելու է աղետի, քանի որ խորությամբ ճանաչում էր բանակցություններին մասնակցող բոլոր կողմերին, ուներ ինստիտուցիոնալ հիշողություն ու գիտեր Ղարաբաղի ու հաղթանակի արժեքը:
«Այո՛, Նիկոլը ճիշտ էր՝ ես չկարողացա բացատրել, իսկ նա կարողացավ խաբել մեր ժողովրդին: Ես չկարողացա ժողովրդին բացատրել, որովհետև ժողովուրդը չէր ցանկանում լսել։ Ես «սխալ» էի՝ լինելով ճիշտ»,- նշել է Սարգսյանը՝ պնդելով, որ այդ ժամանակ առաջադրվեց, որպեսզի երաշխավորի Հայաստանի ու Արցախի անվտանգությունը:
Սարգսյանը 2018-ի ապրիլի 23-ին հրաժարականի մասին հայտարարություն էր տարածել՝ ընդգծելով, որ փողոցի շարժումն իր պաշտոնավարման դեմ է, և ինքը կատարում է այդ պահանջը:
«Փաշինյանը ճիշտ էր։ Ես սխալվեցի։ Ստեղծված իրավիճակն ունի մի քանի լուծում, բայց դրանցից ոչ մեկին ես չեմ գնա։ Դա իմը չէ։ Ես թողնում եմ երկրի ղեկավարի` Հայաստանի վարչապետի պաշտոնը»,- ասված էր այդ ժամանակվա նախագահի հայտարարության տեքստում։
Այսօրվա ուղերձում Սարգսյանն անդրադարձել է նաև հունիսին կայանալիք ԱԺ ընտրություններին չմասնակցելու Հանրապետականի որոշմանը. «Եթե իմ և Հանրապետականի մասնակցությունն անգամ մեկ տոկոսով նպաստելու է այսօրվա վարչակազմի վերարտադրությանը, մենք հետքայլ ենք անում, որպեսզի մարդկանց հնարավորություն տանք սթափ, առանց էմոցիաների արտահայտել իրենց կամքը, իսկ մյուս ընդդիմադիր ուժերին՝ անխոչընդոտ իրականություն դարձնել ընտրություններով իշխանափոխության իրենց խոստումը»։
Նրա խոսքով՝ 2021-ի ընտրություններին էլ մասնակցել էին, որպեսզի փորձեին կանխել Արցախի վերջնական դավաճանումն ու հանձնումը։
