Պաղեստինյան ՀԱՄԱՍ շարժումը հայտնել է, որ Գազայի հատվածում Իսրայելի կողմից իրականացված օդային հարվածների հետևանքով զոհվել է առնվազն 25 մարդ, փոխանցում է ՏԱՍՍ-ը։
«Գազա և Խան Յունիս քաղաքների վրա Իսրայելի կողմից հասցված հարվածների հետևանքով զոհվել է առնվազն 25 մարդ, այդ թվում՝ կանայք և երեխաներ։ Այս հարձակումներն իրավիճակի սրման ակտ են, որի միջոցով Իսրայելի վարչապետ Բենիամին Նեթանյահուն փորձում է վերսկսել պաղեստինցիների ցեղասպանությունը Գազայում»,- ասվում է շարժման տարածած հայտարարության մեջ։
ՀԱՄԱՍ-ը հերքել է, որ իր զինյալները հարձակվել են իսրայելական ուժերի վրա և պնդել, որ հրադադարի ուժի մեջ մտնելուց ի վեր անկլավում զոհվել է ավելի քան 300 պաղեստինցի։
ՀԱՄԱՍ-ի և Իսրայելի միջև զինադադարն ուժի մեջ էր մտել հոկտեմբերի 10-ից։ Համաձայնագրի շրջանակներում շարժման ներկայացուցիչներն Իսրայելին էին փոխանցել 20 պատանդի, որոնք պահվում էին Գազայի հատվածում: ՀԱՄԱՍ-ը նաև պարտավորվել էր հանձնել բոլոր զոհվածների աճյունները, սակայն ութ մարմին մինչ օրս գտնվում է Գազայում:
Իր հերթին՝ Իսրայելը բանտերից ազատ էր արձակել շուրջ 2000 բանտարկյալի՝ ինչպես նախկինում ահաբեկչության համար դատապարտված, այնպես էլ ռազմական գործողությունների ժամանակ ձերբակալված և առանց դատավարության բանտերում պահվող, ինչպես նաև հանձնել էր 360 պաղեստինցի զինվորականի մարմին:
