Ավելի քան մեկ տասնյակ երկրների կառավարություններ դատապարտել են Իսրայելին, երբ նրա զինված ուժերը կրակ են բացել Արևմտյան Ափի փախստականների ճամբարի մոտ գտնվող դիվանագիտական պատվիրակության ուղղությամբ, հաղորդում է «Ալ Ջազիրա»-ն:
Միջադեպի հետևանքով տուժածներ չկան: Իսրայելի բանակը պնդել է, թե զինվորականներն «զգուշացման կրակոցներ» են արձակել, քանի որ արտասահմանցի դիվանագետները, որոնց թվում էին Եվրամիության, Միացյալ Թագավորության, Ռուսաստանի և Չինաստանի ներկայացուցիչները, շեղվել են նախապես համաձայնեցված երթուղուց։
Կանադան հայտարարել է, որ Իսրայելի դեսպանը հրավիրվել է երկրի Արտգործնախարարություն:
«Մենք պահանջում ենք լիարժեք հետաքննություն, որպեսզի նման միջադեպերը երբեք չկրկնվեն»,- նշել է պաշտոնական Պեկինը:
Բեռլինն էլ խստորեն դատապարտել է «անտեղի կրակոցները»։
«Բարեբախտաբար, ավելի լուրջ բան տեղի չի ունեցել»,- ասված է Գերմանիայի արտաքին քաղաքական գերատեսչության հաղորդագրության մեջ:
Միջադեպը տեղի էր ունեցել մայիսի 21-ին:
Նախօրեին՝ մայիսի 22-ին, ԱՄՆ-ի մայրաքաղաք Վաշինգտոնի կենտրոնում գտնվող «Կապիտալ Ջուիշ» հրեական թանգարանի մուտքի մոտ հրազենից Իսրայելի դեսպանատան երկու աշխատակից էր սպանվել։ Հայաստանի ԱԳՆ-ն ցավակցություն էր հայտնել նրանց սպանության կապակցությամբ:
