«Իսլամական պետություն» ահաբեկչական խմբավորումն ակտիվացել է Սիրիայում Բաշար ալ-Ասադի ռեժիմի տապալումից հետո։ Նա պլանավորել էր առնվազն 8 ահաբեկչական հարձակում։ Դրանք կանխվել է ԱՄՆ հետախուզության շնորհիվ, գրել է The New York Times-ը։
Այնուամենայնիվ, իրավիճակը շարունակում է բարդ մնալ։ Լրատվականը զգուշացնում է, որ ԻՊ-ն կարող է փորձել ազատ արձակել զինյալներին երկրի հյուսիս-արևելքում գտնվող բանտերից, որտեղ պահվում են մինչև 10 հազար զինյալ և նրանց ընտանիքների 40 հազար անդամ։ Մարտին անվտանգության ուժերի և ալավիների միջև բախումների հետևանքով հարյուրավոր մարդիկ զոհվել էին, ինչը ցույց է տվել Սիրիայի նոր կառավարության սահմանափակ վերահսկողությունն իր ուժերի նկատմամբ։
ՄԱԿ-ի զեկույցում նշվում է, որ Իրաքում և Սիրիայում զինյալների թիվը կազմում է 3-5 հազար մարդ։ Չնայած ԴԱԻՇ-ի հարձակումները 2024 թվականին նվազել են ԱՄՆ-ի կողմից նրանց թիրախներին հասցված հարվածների շնորհիվ, սպառնալիքը մնում է բարձր։
Սիրիայում զինված հակամարտությունն սկսել էր 2011 թվականից։ Զինադադարը խախտվել էր 2024-ի նոյեմբերի 27-ին, երբ սիրիական մի շարք խմբավորումների զինյալներ՝ «Հայաթ Թահրիր ալ-Շամ» իսլամիստական խմբավորման գլխավորությամբ, հարձակում էին սկսել երկրի հյուսիս-արևմուտքում կառավարական ուժերի դեմ: Նրանք մեկ շաբաթվա ընթացքում գրավել էին երկրի բոլոր խոշոր քաղաքները՝ Հալեպը, Համան, Հոմսը և Դամասկոսը: Ավելի ուշ՝ դեկտեմբերին, այս խմբերը ձևավորել էին նոր կառավարություն:
Հունվարի 13-ին «Գանձասար» թերթի խմբագիր Զարմիկ Պողիկյանն Armenia Today-ին հայտնել էր, որ հայկական համայնքի նկատմամբ նոր իշխանությունների վերաբերմունքը շատ հարգալից է։
Մարտի 6-ին Լաթաքիա, Տարտուս և Հոմս նահանգներում բախումներ էին սկսվել անվտանգության ուժերի և նախկին նախագահի կողմնակիցների զինված խմբերի միջև։ Ամենածանր բախումները տեղի են ունեցել Ջեբլա քաղաքում, որտեղ ապրում են ալավիները՝ կրոնական փոքրամասնություն, որին պատկանում է Ասադների ընտանիքը։ Մարտի 7-ին նոր իշխանությունները վերահսկողության տակ էին վերցրել Լաթաքիա քաղաքը՝ հեռացնելով Ասադի զինված կողմնակիցներին։ Բախումների հետևանքով զոհվել էր շուրջ 200 անձ։ Մարտի 8-ին «Գանձասար»-ը հայտնել էր, որ Լաթաքիայի հայերին հրահանգվել է տներից դուրս չգալ, ավելի ուշ տեղեկացրել Լաթաքիայում կրակոցների հետևանքով երկու հայի զոհվելու մասին։
