ԱՄՆ նախագահ Դոնալդ Թրամփի հատուկ ներկայացուցիչ Սթիվ Ուիտկոֆը կայցելի Ռուսաստան, հայտնում է «Ինտերֆաքս»-ը՝ հղում անելով Սպիտակ տան խոսնակ Քերոլայն Լևիտին։
Ըստ ամերիկյան լրատվամիջոցների՝ նա նշել է, որ Ուիտկոֆն «այս շաբաթ կայցելի Մոսկվա»։ Լևիտը հայտնել է, որ նա մտադիր է Ռուսաստանի ղեկավարների հետ քննարկել Ուկրաինայի հետ զինադադարի հարցը։
Բացի դրանից, Լևիտն ընդգծել է, որ Ռուսաստանի հետ շփումներն իրականացվում են նաև այլ ուղիներով։ Նրա խոսքով՝ ԱՄՆ ազգային անվտանգության հարցերով խորհրդական Մայք Ուոլցն «այսօր հեռախոսով խոսել է իր ռուս գործընկերոջ հետ»։
Ուիտկոֆն ԱՄՆ նախագահի հատուկ բանագնացն է Մերձավոր Արևելքի հարցերով, սակայն նա նաև ակտիվ մասնակցություն է ունենում ուկրաինական ճգնաժամի կարգավորման աշխատանքներին։
Մարտի 12-ին ԱՄՆ պետքարտուղար Մարկո Ռուբիոն Ռուսաստանին կոչ էր արել 30-օրյա հրադադար հաստատել Ուկրաինայում։ Մարտի 11-ին Կիևը համաձայնել էր ընդունել ժամանակավոր հրադադարի մասին ԱՄՆ-ի առաջարկը:
Ռուս-ուկրաինական կոնֆլիկտի կարգավորման գործընթացը մեկնարկել էր ՌԴ նախագահ Վլադիմիր Պուտինի և ԱՄՆ նախագահ Դոնալդ Թրամփի միջև փետրվարի 12-ին կայացած հեռախոսազրույցից հետո։ Փետրվարի 15-ին Սաուդյան Արաբիան պատրաստակամություն էր հայտնել երկրում ընդունել Ռուսաստանի և ԱՄՆ նախագահների հանդիպումը։ Փետրվարի 18-ին Սաուդյան Արաբիայի մայրաքաղաք Էր Ռիադում մեկնարկել էին Ուկրաինայի հարցով Ռուսաստանի և ԱՄՆ պատվիրակությունների բանակցությունները, որոնք տևել էին ավելի քան 4 ժամ։ Ավելի ուշ ԱՄՆ պետքարտուղարությունն Ուկրաինայի հարցով ՌԴ-ի հետ ձեռք բերված 4 պայմանավորվածություն էր հրապարակել։
Փետրվարի 18-ին ԶԼՄ-ները հայտնել էին, որ ԱՄՆ-ն ցանկանում է գրեթե լիակատար վերահսկողություն ունենալ ուկրաինական ռեսուրսների և դրանցից ստացված եկամուտների կեսի վրա։
Փետրվարի 28-ին Ուկրաինայի նախագահ Վլադիմիր Զելենսկին ժամանել էր Վաշինգտոն՝ հանքարդյունաբերության գործարք կնքելու համար։ Նրա հանդիպումը Թրամփի հետ վերածվել էր վիճաբանության՝ հենց լրատվամիջոցների առջև, և գործարքը ձախողվել էր:
