Ռուսաստանն ստեղծել է վերահսկվող անձանց ռեգիստր, որը հնարավորություն է տալիս ստուգել երկրում օտարերկրացիների ներկայության օրինականությունը։ Դրա միջոցով նախորդ տարի արտաքսված օտարերկրացիների թիվն աճել է 45%-ով։ Օտարերկրյա քաղաքացիների ընդհանուր թիվը, ովքեր երկրում մնալու հիմքեր չունեն, կազմել է մոտավորապես 700 հազար, ըստ «Ինտերֆաքս»-ի՝ հայտնել է ՌԴ ՆԳ նախարար Վլադիմիր Կոլոկոլցևը։
Նրանք մինչև ապրիլի 30-ը պետք է հստակեցնեն իրենց կարգավիճակը և այսօրվանից, ըստ նախարարի, կկիրառվեն բոլոր իրավական գործիքները՝ «ընդհուպ մինչև արտաքսում»։
Նախարարը մանրամասնել է, որ ռեգիստրի հրապարակային գործունեության առաջին ամսվա ընթացքում ուղարկվել է 5,5 մլն հարցում, մասնավորապես՝ աշխատանքի տեղավորման հետ կապված։ Այժմ քաղաքացիները կարող են Ներքին գործերի նախարարության կայքի կամ Պետական ծառայությունների պորտալի միջոցով անվճար ստուգել ցանկացած օտարերկրացու՝ պարզելու, արդյոք նա ընդգրկվա՞ծ է այս ռեգիստրում։
Կոլոկոլցևը հիշեցրել է, որ անօրինական միգրանտների կողմից կատարված հանցագործությունն այժմ ծանրացուցիչ հանգամանք է համարվում։ Բացի այդ, առանց վիզայի մուտք գործողների համար կացության առավելագույն ժամկետը կրճատվել է մինչև տարեկան 90 օր։
ՌԴ միգրացիոն ծառայության տվյալներով՝ ամեն տարի առնվազն 300 հազար Հայաստանի քաղաքացիներ մուտք են գործում Ռուսաստան՝ աշխատելու նպատակով։
Կարդացեք նաև՝
Ռուսաստանում ուժի մեջ են մտել միգրացիոն նոր կանոններ. ի՞նչ պետք է իմանալ
