ԱՄՆ նախագահ Դոնալդ Թրամփը հայտարարել է, որ հայազգի փաստաբան Մայքլ Կավուկչյանին Նորվեգիայի Թագավորությունում ԱՄՆ նոր դեսպան է նշանակել։ Այս մասին Թրամփը հայտնել է իր Truth սոցիալական ցանցում։
Կավուկչյանը վաստակավոր իրավաբան է և միջազգային White & Case իրավաբանական ընկերության ավագ գործընկերը, որտեղ նա ղեկավարում է թիմեր, որոնք ամբողջ աշխարհում զբաղվում են բարդ առևտրային դատավարություններով, ասել է Թրամփը:
Նախկինում նա ծառայել է ԱՄՆ Կենտրոնական հետախուզական վարչությունում։ Կավուկչյանն ավարտել է Սթենֆորդի համալսարանը և Հարվարդի իրավաբանական դպրոցը։
Բացի մասնագիտական գործունեությունից, նրա ընտանիքն ակտիվ մասնակցություն է ունեցել Հայաստանում իրականացվող բարեգործական ծրագրերում։ 2020 թվականին նրանք օգնել են 44-օրյա պատերազմի մասնակիցներին՝ ընտանեկան հիմնադրամի միջոցով նրանց տրամադրելով բարձրորակ լսողական սարքեր։
2021 և 2022 թվականներին նրա հիմնադրամը կենտրոնացել է հակամարտությունից տուժածներին աջակցելու վրա, իսկ 2023 թվականին շարունակել է առաքելությունը՝ աջակցելով նրանց, ովքեր տարբեր պատճառներով չեն ստացել պետական կամ այլ աջակցություն։
