Մինչ ուղևորները փորձում էին հարմարվել թղթային կտրոններով քաղաքային տրանսպորտից օգտվելու նորամուծությանը, «խաղի կանոնները» նորից փոխվում են։
Օգոստոսի 1-ից Երևանում չեղարկվել է տրանսպորտով երթևեկության համար թղթային տարբերակով վճարումը։ Հիմա տրանսպորտի համար հնարավոր է վճարել 3 տոմսային կրիչով, դրանք են՝ տրանսպորտային քարտը, անհպում բանկային քարտը և Telcell Wallet բջջային հավելվածը։
Armenia Today-ին Երևանի քաղաքապետարանից հավաստիացրել են, որ նշված 3 վճարային մեթոդներն ընտրվել են այնպես, որ պահանջեն «նվազագույն կարողություններ և հասանելի լինեն բոլոր ուղևորների համար»։
Քաղաքապետարանից նաև փոխանցել են, որ անտոմս երթևեկելը կամ տոմսը չվավերացնելն այսուհետ բերելու է վարչական պատասխանատվության, իսկ տերմինալների անսարքության պատճառով տոմս չվավերացնելը չի համարվելու խախտում: Նկատելի փոփոխությունն այս նորամուծությունից այն է, որ ուղևորը, որը չի կարող օգտվել էլեկտրոնային վճարման տարբերակից, ստիպված է լինելու ձեռք բերել բազմակի օգտագործման տրանսպորտային քարտ նույնիսկ այն դեպքում, երբ իրեն անհրաժեշտ է միայն մեկ տոմս։
Armenia Today-ի նկարահանող խումբը փորձել է պարզել, թե այս փոփոխությունն ինչպե՞ս է անդրադարձել երթևեկության վրա արդեն այսօր, արդյոք ավելի հարմարավե՞տ է դարձել տրանսպորտից օգտվելը, թե՞ հերթական փորձարկումը քաղաքային երթևեկության բնագավառում նորից առաջացրել է դժվարություն ուղևորների և վարորդների համար։
Քաղաքացիներից ոմանց կարծիքով՝ այս փոփոխությունները դժվարացրել են առանց այն էլ բարդ իրավիճակը։
«Քաղաքապետարանում թող տեսնեն, ինչքան վատ բաներ են անում։ Քարտով եմ վճարում, բայց մարդիկ կան, չեն կարողանում։ Ժողովրդի անցավ գլուխը դրեցին ցավի տակ»,- նշել է մի կին։
Հարցվածներից մյուսը տեղյակ էլ չէր նոր փոփոխության մասին և նշել է, որ ստիպված քարտ պետք է գնի։
Ոմանց քարծիքով՝ քարտային տարբերակը հարմար է, օգտագործում են և չեն դժգոհում։ Մյուսներն էլ օգտվում են հեռախոսով տարբերակից։
«Աղջիկս է գնել։ Մեր տարիքում դժվար է։ Քաղաքապետարանում մեքենայով են ման գալիս, ի՞նչ նշանակություն ունի, թե մենք ինչպես ենք անում»,- նշել է նա։
Քաղաքացիներից մեկն էլ նշել է, որ սկզբում բոյկոտում էր, սակայն հիմա հիասթափվել է և հասկացել, որ ոչինչ չի փոխվում։
Մանրամասները՝ Armenia Today-ի տեսանյութում:
