«Դա բանակի կազմաքանդում է», «գուցե ձեռնտու է». հարցում՝ գումարի դիմաց ծառայությունը կրճատելու մասին

Կառավարությունը սահմանել է 24 ամսից պակաս ժամկետով պարտադիր զինվորական ծառայություն անցնելու հնարավորությունը։ Ըստ այդմ՝ առաջարկվում է 18 կամ 24 միլիոն դրամ վճարելով կրճատել երկու տարվա ծառայությունը: Մեկ ամսվա ծառայության դեպքում քաղաքացու վճարը կլինի 24 մլն դրամ, իսկ չորս ամսվա ծառայության համար՝ 18 մլն դրամ:

Կառավարությունը յուրաքանչյուր զորակոչից առաջ կսահմանի նաև, թե քանիսը կարող են օգտվել նման հնարավորությունից: Զինվորական ծառայության առավելագույն տարիքը, ըստ նախագծի, 27-ից կդառնա 32 տարեկան:

Ազգային ժողովի Պաշտպանության հարցերի հանձնաժողովի նիստում մայիսի 26-ին նախատեսված էր հարցի քննարկումը, սակայն այն հետաձգվել է: Հանձնաժողովի փոխնախագահ Արմեն Խաչատրյանը հայտարարել է, որ պատճառը «քննարկում պահանջող այլ հրատապ հարցերն» էին, մինչդեռ ընդդիմադիր Գեղամ Մանուկյանը կարծում է՝ իրականում այն չեղարկվել է իշխանությունների մտահոգության պատճառով, որ քվեարկության արդյունքները կարող են հանգեցնել հանձնաժողովի բացասական եզրակացության։

Armenia Today-ի նկարահանող խումբը քաղաքացիներին հարցրել է, թե կո՞ղմ են այս նախագծին, նաև հետաքրքրվել, թե ի՞նչ վտանգներ կարող է այն ունենալ:

Հարցմանը մասնակցած քաղաքացիների մեծամասնությունը դեմ է արտահայտվել այս նախագծին, քանի որ ըստ իրենց՝ դրանով բանակը կկազմաքանդվի։

«Երկիրը քանդելու նոր տարբերակ է»,- ասել է քաղաքացիներից մեկը:

«Դեմ եմ, քանի որ սա բանակի կազմաքանդում է։ 1 կամ 4 ամսով զինվոր չեն դառնում, հայրենիք չեն պահում։ Մեր իշխանությունները գնում են նրան, որ ցանկացած ձևով բանակը կազմալուծեն, ոչ թե կազմավորեն։ Հարուստները բանակ չեն գնա, կամ մարդիկ պարտքով գումար կգտնեն, որ իրենց երեխան բանակ չգնա, քանի որ բանակը վախենալու են սարքել»,- նշել է մեկ այլ քաղաքացի։

Երևանցիներից մեկն էլ, իր դժգոհությունը հայտնելով, ասել է, որ հայրենիքը միայն փող ունեցողների համար չէ. «Հայրենիքը բոլորի համար է, ինչի՞ պետք է ես փող տամ, որ իմ տղան գնա, մի քանի ամիս ծառայի, իսկ խեղճ, քյասիբ մարդկանց տղաները գնան, 2 տարի ծառայեն։ Պետք է արդարություն լինի»։

Քաղաքացիներից միայն մեկն է, որ ոչ լրիվ բացասական կարծիք է հայտնել. «Եթե գումարը գնալու է ծառայողների եկամուտների ավելացմանը, գուցե ձեռնտու է»:

Մանրամասները՝ Armenia Today-ի տեսանյութում