Ստեփանծմինդա-Լարս ավտոճանապարհը փակ է բեռնատարների համար, հայտնում է Հայաստանի ՆԳՆ փրկարար ծառայությունը՝ հղում անելով Վրաստանի ՆԳՆ ԱԻ դեպարտամենտին և Հյուսիսային Օսիայի ԱԻՆ ճգնաժամային կառավարման կենտրոնին։
Հայաստանում ևս կան փակ ավտոճանապարհներ․ փակ են Արագածոտնի մարզում «Ամբերդ» բարձր լեռնային օդերևութաբանական կայանից Քարի լիճ և Ամբերդ ամրոց տանող ավտոճանապարհները։ Սարավան-«Զանգեր» կոչվող ճանապարհահատվածը փակ է կցորդիչով բեռնատարների համար:
Գերատեսչության տվյալներով՝ Դիլիջան-Վանաձոր ավտոճանապարհը դժվարանցանելի է կցորդիչով բեռնատարների համար, Կիրանց-Ոսկեպար ավտոճանապարհը՝ բեռնատարների համար։ Բերդ-Ճամբարակ ավտոճանապարհը դժվարանցանելի է բոլոր տեսակի տրանսպորտային միջոցների համար։
Սյունիքի, Տավուշի մարզերում, Արագածի տարածաշրջանում, Տիգրանաշենի ոլորաններում, Վանաձոր, Ստեփանավան, Տաշիր, Սպիտակ, Սևան, Ճամբարակ քաղաքներում տեղում է ձյուն: «Զանգեր» կոչվող հատվածում մառախուղ է:
ՆԳՆ-ն հայտնում է, որ Վարդենյաց լեռնանցքում, Գորայք-«Զանգեր» կոչվող հատվածում և Աշոցքի տարածաշրջանում բուք է և վարորդներին հորդորում է երթևեկել բացառապես ձմեռային անվադողերով։
