Ադրբեջանը ոչնչացրել է օկուպացված Ստեփանակերտում տեղադրված ծովանկարիչ Հովհաննես (Իվան) Այվազովսկու հուշարձանը, հայտնում է Արցախի զբոսաշրջության և մշակույթի զարգացման գործակալությունը։
Գործակալությունը շեշտել է, որ հուշարձանի ոչնչացումն Արցախում հայկական մշակութային ներկայության համակարգված վերացման հերթական վկայությունն է։
Հայկական ծագում ունեցող հայտնի ծովանկարիչը ծնվել է 1817 թվականին Թեոդոսիայում և մահացել է այնտեղ՝ 1900 թ.-ին։ Նա իր ժամանակվա ամենահայտնի և հաջողակ վարպետներից մեկն էր, ճանաչված ինչպես Ռուսական կայսրությունում, այնպես էլ արտերկրում։
Ստեփանակերտում Այվազովսկու հուշարձանը տեղադրվել էր 2021-ին։ Հուշարձանի հեղինակն է քանդակագործ Սերգեյ Շչերբակովը։ Այն նվիրված էր ոչ միայն համաշխարհային ճանաչում ունեցող հայ նկարչին, այլև Արցախը հայկական և համազգային մշակութային ժառանգությանը միացնող կապերին։
Ադրբեջանը 2023 թվականի սեպտեմբերից հողին էր հավասարեցրել Արցախի չորս գյուղ ու ոչնչացրել մի քանի տասնյակ մշակութային հուշարձաններ, որոնց թվում են ավելի քան 10 եկեղեցի, շուրջ 50 հուշահամալիր, քանդակներ ու խաչքարեր։ Օկուպանտները ոչնչացրել էին Շուշիի շրջանի Քարին Տակ գյուղը, ինչպես նաև Հադրութի շրջանի Մոխրենես, Մարիամաձոր և Ցամաքձոր գյուղերը։
Armenia Today-ն իր հոդվածում տեղեկություններ է հավաքել Արցախի տարածքում պատմամշակութային նշանակության բոլոր ավերված հուշարձանների մասին, որոնք 2023 թվականի սեպտեմբերին Արցախի վրա Ադրբեջանի հարձակումից հետո Բաքվի կողմից մշակութային ցեղասպանության քաղաքականության զոհն են դարձել:
Կարդացեք նաև՝ «Մեկ տարի առանց Արցախի». 2023թ․ ադրբեջանական հարձակման և բնիկ հայերի տեղահանության ժամանակագրություն։
