Բաքվի «դատարանը» նիստի ընթացքում մերժել է Արցախի նախկին պետնախարար Ռուբեն Վարդանյանի միջնորդությունները:
Ինչպես հաղորդում են տեղական լրատվամիջոցները, Վարդանյանը միջնորդություն է ներկայացրել իր ընտանիքի անդամներին մեղադրական ակտի պատճենը տրամադրելու վերաբերյալ, ինչպես նաև խնդրել է քննել այն միջնորդությունները, որոնք նա ներկայացրել էր նախորդ լսումներին: Դատարանը միջնորդությունը չի ներկայացրել քննարկման։
Բացի դրանից, Վարդանյանը միջնորդել է փորձաքննություն անցկացնել՝ ստուգելու գործով մեղադրական ակտի ռուսերեն թարգմանության համապատասխանությունն ադրբեջաներեն տեքստին։ Խորհրդակցությունից հետո դատարանը չի բավարարել միջնորդությունը։
Հաջորդ նիստը տեղի կունենա հունիսի 17-ին:
Ադրբեջանում, պաշտոնական տվյալներով, 23 հայ գերի կա։ Իրավապաշտպան Սիրանուշ Սահակյանի տվյալներով՝ Ադրբեջանում գերեվարման մեջ գտնվող շուրջ 80 հայ ենթարկվել է բռնի անհետացման։ 2024-ի դեկտեմբերին Բաքուն դատարան է ուղարկել Ադրբեջանում ապօրինի պահվող 15 անձանց, այդ թվում՝ Արցախի նախկին առաջնորդների քրեական գործը։ Նրանք մեղադրվում են 2548 դրվագով։ Հունվարի 17-ին սկսվել են Արցախի առաջնորդների դատավարությունները:
Գործով անցնում են Արցախի նախկին նախագահներ Արկադի Ղուկասյանը, Արայիկ Հարությունյանը և Բակո Սահակյանը, պետնախարար Ռուբեն Վարդանյանը, ԱԺ նախագահ Դավիթ Իշխանյանը, արտգործնախարար Դավիթ Բաբայանը, պաշտպանության նախկին նախարար Լևոն Մնացականյանը, Պաշտպանության բանակի հրամանատարի նախկին առաջին տեղակալ Դավիթ Մանուկյանը, ինչպես նաև Գարիկ Մարտիրոսյանը, Մելիքսեթ Փաշայանը, Դավիթ Ալավերդյանը, Գուրգեն Ստեփանյանը, Լևոն Բալայանը, Մադաթ Բաբայանը, Վասիլի Բեգլարյանը և Էրիկ Ղազարյանը: Ռուբեն Վարդանյանի գործն առանձին է քննվում։ Նրան սպառնում է ցմահ ազատազրկում Բաքվի բանտում։
