Սամվել Շահրամանյանը կարող է լինել Արցախի նախագահի միակ թեկնածուն, հայտնել է «Հրապարակ» օրաթերթը։
Թերթը հիշեցրել է, որ այսօր լրանում է նրա պաշտոնավարման ժամկետը, հետևաբար Շահրամանյանի լիազորություններն այսօրվանից համարվում են դադարեցված։
«Մինչ այս պահը որևէ ուժ չի հայտնել թեկնածու առաջադրելու մտադրության մասին, հետևաբար՝ Շահրամանյանը հնարավոր է դառնա խորհրդարանի միասնական թեկնածուն»,- նշել է թերթը։
Արցախի Ազգային ժողովի խմբակցությունները մտադիր են Շահրամանյանին վերընտրել նախագահի պաշտոնում, գրել է «Ժողովուրդ»-ը:
Ըստ թերթի՝ Արցախի թևը փորձում է այսպիսով արցախահայությանը զերծ պահել պառակտումից, իսկ իշխող «Քաղաքացիական պայմանագիր» կուսակցությունից ուղղորդվող թևը ջանում է պառակտել նրանց:
Մամուլը հայտնել էր, որ Արցախի ՏԿԵ նախկին նախարար, ծնունդով իջևանցի Հայկ Խանումյանի անունն էլ է արցախցիների քաղաքացիական շրջանակում շրջանառվում որպես նոր նախագահի թեկնածու։
Արցախի ներկայացուցչությունում ապրիլի 21-ին ավելի քան երկու ժամ փակ քննարկում էր տեղի ունեցել Շահրամանյանի, պետնախարարի և արցախցի ակտիվիստների մասնակցությամբ։ Քննարկման թեմաներից մեկն Արցախի նախագահի լիազորությունների երկարաձգումն էր։ Նոր Սահմանադրությամբ՝ նախագահին պետք է ընտրի Արցախի խորհրդարանը, քանի որ ընտրություններ անցկացնել հնարավոր չէ։
