2018-2023 թվականներին Հայաստանի Հանրապետությունը Լեռնային Ղարաբաղին 130%-ով ավելի գումար է հատկացրել, քան 2012-2017-ին, ՀՀ կառավարության 2021-2026 թթ. ծրագրի՝ 2024 թվականի կատարման ընթացքի և արդյունքների մասին զեկույցի քննարկմանն ԱԺ-ում հայտարարել է վարչապետ Նիկոլ Փաշինյանը։
«2018-2023 թվականներին 367 մլրդ դրամի աջակցություն է ցուցաբերվել ԼՂ-ին։ 2018-ից մինչ օրս ԼՂ-ին 1,3 մլրդ դոլար (548 մլրդ դրամ) ենք հատկացրել»,- ասել է նա՝ արձագանքելով քննադատություններին, թե ՀՀ կառավարությունը հակված չէ Արցախից բռնի տեղահանվածներին աջակցություն տրամադրել։
«Մենք պետք է օգնենք, որ մարդիկ աշխատեն, ապրեն»,- նշել է Փաշինյանը։
Ապրիլից Հայաստանի իշխանությունները կրճատել էին «40+10» աջակցության ծրագրով բնակվարձի փոխհատուցում ստացող արցախցիների թիվը՝ բացատրելով, որ այդ աջակցությունը խոչընդոտում է բռնի տեղահանվածներին բնակարանով ապահովելու երկարաժամկետ պետական ծրագրերին։ Այդ որոշման դեմ մարտի 29-ին արցախցիները հանրահավաք էին անցկացրել, որտեղ պահանջել էին շարունակել բնակվարձի փոխհատուցումը, ինչպես նաև բանակցել արցախցիների հայրենիք վերադարձի, ռազմագերիների ազատ արձակման և բռնի տեղահանվածներին աջակցելու երկարաժամկետ սոցիալական ծրագրերի կազմակերպման շուրջ։ Նույն օրը նրանք վրաններ էին տեղադրել «Ազատության» հրապարակում։
Ապրիլի 10-ի նիստում կառավարությունը որոշում էր ընդունել Արցախից բռնի տեղահանված կարիքավոր ընտանիքներին մինչև 2025 թվականի դեկտեմբեր ամիսը ներառյալ ամենամսյա դրամական աջակցություն տրամադրել։
Կարդացեք նաև՝
«Մեկ տարի առանց Արցախի». 2023թ․ ադրբեջանական հարձակման և բնիկ հայերի տեղահանության ժամանակագրություն
Բարձր հարկեր և աջակցության բացակայություն. ի՞նչ դժվարություններ ունի արցախյան բիզնեսը Հայաստանում
