Վարչապետ Նիկոլ Փաշինյանը սոցիալական ցանցերում շարունակում է քննադատել հոգևորականներին՝ պնդելով, որ եպիսկոպոսները, Գարեգին Բ կաթողիկոսի գիտությամբ, վարում են այնպիսի ապրելակերպ, որով «անհնար է մեկ ամիս ապրել առանց կնոջ»։
Նա կարծում է, որ առանց կաթողիկոսի նման ապրելակերպի թույլտվության՝ Շիրակի թեմի արքեպիսկոպոս Միքայել Աջապահյանը և մյուս եպիսկոպոսները «վաղուց կարգալույծ կլինեին»։
Փաշինյանը Մայր Աթոռի համապատասխան կառույցներին կոչ է արել քննարկել Աջապահյանի հայտարարությունը և հանրությանը տրամադրել համապարփակ պարզաբանումներ։
Մեկ այլ գրառմամբ վարչապետը նշել է, որ կուսակրոնության ուխտը խախտած բոլոր հոգևորականները պետք է հեռանան հոգևոր ծառայությունից։
Աջապահյանը News.am-ի եթերում հայտարարել է, որ պետական պաշտոնյաները «նույնիսկ մեկ շաբաթ չեն կարող ապրել այն կյանքով, որով վանականներն ապրում են շուրջ քառասուն տարի»։ Նա ընդգծել է, որ հոգևորականները պարտավոր չեն հաշվետու լինել յուրաքանչյուր հավատացյալի, այլ միայն իրենց հոգևոր հոր և եկեղեցական իշխանության առաջ։
«Եկեղեցական իշխանությունն իր ներքին հարցերում լիակատար անկախ է, և պետությունն իրավունք չունի միջամտելու։ Այլ բան է, եթե հոգևորականը խախտում է աշխարհիկ օրենքները, կատարում է քրեական հանցագործություն, ապա կարող եք ձերբակալել, բանտարկել, ձեռնարկել բոլոր անհրաժեշտ միջոցները։ Բայց կուսակրոնության խախտումը քրեական հանցագործություն չէ, ոչ էլ խարդախություն և, ընդհանուր առմամբ, դա նրանց (իշխանություններին - խմբ․) չի վերաբերում»,- ասել է արքեպիսկոպոսը։
Նա Փաշինյանի և նրա կնոջ՝ Աննա Հակոբյանի հրապարակումները կապել է այն փաստի հետ, որ վերջին հարցումների համաձայն՝ եկեղեցու վարկանիշը բարձրացել է։
«Երկուսն էլ հիստերիայի մեջ են ընկել, վախեցած են, նյարդային։ Յոթ տարի շարունակ ամեն ինչ արեցին, ամբողջ կեղտը լցրեցին Հայ եկեղեցու և քահանաների վրա, բայց չնայած դրան՝ եկեղեցու հեղինակությունը մեծացավ։ Ինչպե՞ս կարող են չանհանգստանալ»,- ասել է Աջապահյանը։
Շիրակի թեմի առաջնորդն ուշադրություն է հրավիրել այն փաստի վրա, որ եկեղեցու նկատմամբ իշխանությունների քննադատությունը հաջորդել է Կովկասի մուսուլմանների վարչության նախագահ Ալլահշուքյուր Փաշազադեի նմանատիպ հայտարարություններին։
«Սա արշավ է Հայ եկեղեցու դեմ, որը վերահսկվում է մեկ կենտրոնից, բայց եկեղեցին այս անգամ էլ հաղթանակ կտանի: Նրանք համակարգված կերպով պայքարում են նույն հաստատության դեմ, որն իրենք անվանել են ռևանշիստական և հինգերորդ շարասյուն»,- ասել է նա։
Աջապահյանն իրավապահ մարմիններին կոչ է արել ուսումնասիրել Հակոբյանի հրապարակումը, որ իբր հոգևորականների շրջանում կան այլասերվածներ։ Եթե նա չի կարող անուններ տալ, ապա, ըստ արքեպիսկոպոսի, պետք է պատասխանատվության ենթարկվի զրպարտության համար։
«Այսինքն՝ նա գիտի հոգևորականների շրջանում այլասերվածների անունները և լռում է։ Այդ դեպքում նա հանցագործ է»,- եզրափակել է արքեպիսկոպոսը։
Մայիսի 29-ին Փաշինյանը հայտարարել էր, թե «հայկական եկեղեցիները չուլանոց, աղբավայր են դարձրել»։ Մայիսի 30-ի առավոտյան վարչապետը մի շարք գրառումներով անդրադարձել էր հոգևորականների՝ իրեն ուղղված քննադատություններին, որոնք հնչել էին նրա հայտարարություններին ի պատասխան։ Փաշինյանը նաև ՀՀ իշխանություններին կոչ էր արել մասնակցել կաթողիկոսի ընտրություններին՝ պնդելով, որ կաթողիկոսի թեկանածուները պետք է բարեվարքության ստուգում անցնեն։
Վարչապետի կինը՝ Աննա Հակոբյանը, հոգևորականներին մեղադրել էր այլասերվածության մեջ՝ նշելով, որ նրանք, իբր, «չուլաններում կատարում են այլասերվածություններ և հավատավոր ժողովրդի ցասմանն անգամ չեն արժանանում»։ «Սրբազան պայքար» շարժման առաջնորդ, արքեպիսկոպոս Բագրատ Գալստանյանը Մայր Աթոռին կոչ էր արել դատական գործընթաց սկսել Փաշինյանի և նրա կնոջ կողմից հոգևորականների դեմ վիրավորական հրապարակումների կապակցությամբ։
