Սա բլոկադայի դեմ պայքար չէ, մեր հայրենիքում ապրելու իրավունքի պայքար է: «Մեկ ամիս շրջափակման մեջ. հումանիտար ճգնաժամ» խորագիրը կրող տեսակամուրջի ժամանակ նշեց Արցախի պետնախարար Ռուբեն Վարդանյանը:
«Մենք արդեն 31 օր է՝ բլոկադայի մեջ ենք, ինչը նշանակում է, որ ամեն տեղ խնդիրներ ունենք: Մենք նաև պարենային ապրանքների հետ կապված խնդիրներ ունենք: Կան նաև մահացած մարդիկ, որոնց շրջափակման հետևանքով չենք կարողանում տեղափոխել Արցախ ու հողին հանձնել: Ամեն տեղ խնդիր կա»,- ասաց պետնախարարը:
Միևնույն ժամանակ, ըստ վարդանյանի, այս ամենն իրենց միավորել է:
«Ճգնաժամը հաղթահարելու ոգին մեր մեջ կա: Ժողովուրդը պատրաստ է մեր կողքին կանգնել, ինչը ցույց տվեց դեկտեմբերի 25-ի հանրահավաքը: Ժողովուրդը պատրաստ է մեր կողքին կանգնել, որովհետև սա ոչ թե պայքար է բլոկադայի դեմ, այլ պայքար է մեր ամենակարևոր իրավունքի համար՝ ըստ որի, մենք մեր հողի վրա մեր արժեքներով, մեր օրենքներով ապրելու իրավունք ունենք ու ոչ ոքի պայմաններին չպետք է ենթարկվենք: Այդ հասկացողությունն ամեն օր ուժեղանում է»,- ասաց Վարդանյանը:
Հիշեցնենք, որ դեկտեմբերի 12-ի առավոտյան ժամը 10:30–ից ընդհատված է Շուշիի շրջանի Լիսագոր, Մեծ շեն, Հին շեն և Եղցահող գյուղերի կապը մայրաքաղաք Ստեփանակերտի հետ։ Քաղաքացիական հագուստներով մի խումբ ադրբեջանցիներ, կրկին բնապահպանական պատճառաբանությամբ փակել են Ստեփանակերտ-Գորիս մայրուղին:
Արցախի պետնախարար Ռուբեն Վարդանյանն գլխավորությամբ ստեղծվել է օպերատիվ շտաբ, որը գործում է 24-ժամյա ռեժիմով՝ Ադրբեջանի կողմից Հայաստանի հետ կապող ճանապարհի արգելափակման հետևանքով ստեղծված իրավիճակում աշխատանքների համակարգման նպատակով:
Դեկտեմբերի 14-ից սկսած բողոքի ակցիաներ են սկսվել ՀՀ-ում տարբեր կառույցների ներկայացուցչությունների և դեսպանությունների մոտ։
ՄԱԿ-ի Անվտանգության խորհուրդը քննարկել է իրավիճակը Լաչինի միջանցքում։ Նիստի ընթացքում ԱՄՆ-ի, Ռուսաստանի, Ֆրանսիայի և Մեծ Բրիտանիայի ներկայացուցիչները հայտարարել են միջանցքով երթևեկությունը վերականգնելու անհրաժեշտության մասին:
Դեկտեմբերի 25-ին Արցախում՝ Ստեփանակերտի Վերածննդի հրապարակում, բազմահազարանոց համաժողովրդական հանրահավաք տեղի ունեցավ:
Արցախի կառավարությունը հայտարարել է, որ ժամանակավորապես դադարեցնում է հանքի շահագործումը. որոշում է կայացվել դիմել միջազգային կազմակերպություններին՝ «Բեյզ Մեթըլս» ընկերության գործունեության հետ կապված միջազգային էկոլոգիական փորձաքննություն իրականացնելու համար
Մանրամասները՝ տեսանյութում:
