Իսրայելը գիշերն օդային լայնամասշտաբ հարված է հասցրել Իրանին, կան զոհեր, որոնց թիվն այս պահին հստակ չէ, հաղորդում է IRNA գործակալությունը: NourNews գործակալության տվյալներով՝ հարձակման հետևանքով զոհվել է 5 մարդ, ևս 20-ը վիրավորվել են։
ՏԱՍՍ-ը, հղում անելով Al Masirah հեռուստաալիքին, տեղեկացրել է, որ հարվածներ են հասցվել Նաթանզ քաղաքի միջուկային օբյեկտին, ինչպես նաև Խորամաբադ և Համադան քաղաքներին։ Միևնույն ժամանակ, իրանական լրատվամիջոցները հաղորդում են պայթյունների մասին նաև մայրաքաղաքում՝ հրապարակելով կադրեր, որտեղ տեսանելի են բնակելի տների և ոչ ռազմական ենթակառուցվածքների վնասվածքները։
Իրանական պետական լրատվամիջոցների տարածած լուսանկարներում ու տեսանյութերում երևում են նաև ծխի սյուներ, որոնք բարձրանում են Նաթանզի միջուկային օբյեկտից։
Իսրայելի վարչապետ Բենիամին Նեթանյահուն հաստատել է Նաթանզում ուրանի հարստացման գլխավոր օբյեկտին հասցված հարվածների մասին տեղեկությունը և հայտարարել է գործողությունը շարունակելու մտադրության մասին։
«Մենք հարվածել ենք Նաթանզում ուրանի հարստացման գլխավոր օբյեկտին։ Մենք չեզոքացրել ենք իրանական ատոմային ռումբի ստեղծման վրա աշխատող գիտնականներին։ Մենք նաև հարվածել ենք իրանական բալիստիկ հրթիռային ծրագրի ամենակարևոր կենտրոնին», — հավելել է Նեթանյահուն։
Իսրայելական բանակը մանրամասնել է, որ գործի է դրվել ռազմաօդային ուժերի ավելի քան 200 կործանիչ, դրանք հարվածներ են հասցրել Իրանի տարածքում ավելի քան 100 թիրախների, այդ թվում՝ իրանցի բարձրաստիճան ռազմական հրամանատարների թաքստոցներին:
Իրանի գերագույն առաջնորդ Ալաթոլլահ Ալի Խամենեին հաստատել է, որ հարվածների հետևանքով զոհվել են մի շարք հրամանատարներ և գիտնականներ։
Նա հայտարարել է, որ Իսրայելը կատարել է «հանցագործություն լուսաբացին», հավելել, որ այդ հարվածներն ուղղված էին բնակելի թաղամասերի վրա։ Նա խիստ պատիժ է խոստացել Իսրայելին՝ ասելով, որ նրանց սպասվում է «դառը և սարսափելի ճակատագիր»։
«Սիոնիստական ռեժիմն այս հանցագործությամբ իր համար պատրաստեց դառը և ցավալի ճակատագիր, որը հաստատ կստանա»,- հայտարարել է Խամենեին:
Զոհերի թվում են Իրանի ռազմական և գիտական վերնախավի մի շարք առանցքային ներկայացուցիչներ, այդ թվում՝ Իսլամական հեղափոխության պահապանների կորպուսի (ԻՀՊԿ) գլխավոր հրամանատար Հոսեյն Սալամին, Իրանի զինված ուժերի գլխավոր շտաբի պետը՝ ԻՀՊԿ գեներալ-մայոր Մոհամմադ Բաղերին, «Հաթամ ալ-Անբիա» կենտրոնական շտաբի հրամանատար Գոլամալի Ռաշիդը, միջուկային գիտնական, Իրանի ատոմային էներգիայի կազմակերպության նախկին ղեկավար Ֆերեյդուն Աբբասին, Իրանի միջուկային ծրագրի ևս մեկ փորձագետ Մոհամմադ Մեհդի Թեհրանչին:
Հեղափոխության գերագույն առաջնորդի հրամանագրով գեներալ Սարդար Վահիդին նշանակվել է ԻՀՊԿ գերագույն հրամանատար, Հաբիբոլլա Սայարին՝ ԶՈՒ ԳՇ ժամանակավոր ղեկավար:
Բացի այդ, ըստ Mehr-ի, լուրջ վնասվածքներ է ստացել Ալի Շամխանին, որն Իրանի գերագույն առաջնորդ Այաթոլլա Ալի Խամենեիի ամենամոտ խորհրդականներից մեկն է:
Reuters-ը գրում է, որ իսրայելական կողմը հայտարարել է՝ գործողությունը շարունակվելու է՝ նպատակ ունենալով «զրկել Իրանին միջուկային զենք ստեղծելու հնարավորությունից»։
Իրանի պաշտպանության նախարարությունը խոստացել է Իսրայելի և ԱՄՆ-ի հարվածներին ի պատասխան քայլեր ձեռնարկել: Իրանի ԱԳՆ-ն հայտարարել է, որ Իսրայելի հարվածները չէին կարող իրականացվել առանց ԱՄՆ-ի գիտության և համակարգման։ Արտգործնախարար Աբբաս Արաղչին էլ հավելել է՝ Իսրայելի ագրեսիային արձագանքելն Իրանի օրինական իրավունքն է՝ համաձայն ՄԱԿ-ի կանոնադրության 51-րդ հոդվածի:
ՄԱԿ-ի գլխավոր քարտուղարի գրասենյակի հաղորդմամբ՝ Անտոնիո Գուտերեշը կոչ է արել Իսրայելին և Իրանին հանդես գալ «առավելագույն զսպվածությամբ» և խուսափել տարածաշրջանում հակամարտության սրումից:
ԱՄՆ նախագահ Դոնալդ Թրամփը Fox News-ին տված հարցազրույցում հայտարարել է, որ նախապես տեղյակ էր Իսրայելի՝ Իրանի վրա հարված հասցնելու ծրագրերից: Նա ընդգծել է, որ Միացյալ Նահանգները ներգրավված չէ այդ գործողության մեջ։
ԱՄՆ նախագահի խոսքով՝ Վաշինգտոնն սպասում է՝ արդյոք Թեհրանը կձեռնարկի՞ պատասխան հարված, իսկ ԱՄՆ զինված ուժերի Կենտրոնական հրամանատարությունը գտնվում է բարձր պատրաստվածության վիճակում։
Թրամփը նշել է, որ ԱՄՆ-ն կպաշտպանի իրեն և Իսրայելին, եթե Իրանը դիմի պատասխան գործողությունների։
«Չի կարելի թույլ տալ, որ Իրանն ստանա միջուկային ռումբ, և մենք հույս ունենք վերադառնալ բանակցությունների սեղանի շուրջ»,- ասել է նա:
ԱՄՆ պետքարտուղար Մարկո Ռուբիոն, CNN-ի հաղորդմամբ, հավելել է, որ Իսրայելը միակողմանի գործողություններ է ձեռնարկել Իրանի դեմ:
«Մենք չենք մասնակցում Իրանի վրա հասցվող հարվածներին, և մեր գլխավոր խնդիրն է շարունակել պաշտպանել տարածաշրջանում տեղակայված ամերիկյան ուժերը»,- նշել է նա:
CNN-ի տվյալներով՝ ներկայում Մերձավոր Արևելքում տեղակայված է մոտ 40 000 ամերիկացի զինծառայող, որոնցից շուրջ 4000-ը գտնվում են Իրաքում և Սիրիայում։ Բացի այդ, տարածաշրջանում տեղակայված է նաև ԱՄՆ ռազմածովային ուժերի ավիակիրի հարվածային խումբը:
Իրանն Իսրայելի ուղղությամբ վերջին մի քանի ժամում ավելի քան 100 անօդաչու թռչող սարք է արձակել, հաղորդում է The Times of Israel-ը՝ վկայակոչելով Իսրայելի բանակի խոսնակ Էֆի Դեֆրինին։ Նրա խոսքով՝ անօդաչուները, որոնք արձակվել են Իրանից, Իսրայել կհասնեն մի քանի ժամից։
Այս ռազմական գործողությունների հետևանքով կտրուկ բարձրացել են նավթի գները:
