Վրաստանը պատրաստ է ԱՄՆ-ի հետ ռազմավարական գործընկերությունը թարմացնել կոնկրետ ճանապարհային քարտեզով, կոնկրետ ցուցանիշներով և կոնկրետ նպատակներով և ամեն ինչ սկսել «մաքուր էջից», հայտարարել է Վրաստանի վարչապետ Իրակլի Կոբախիձեն։
«Մենք շահագրգռված ենք հարաբերությունների վերականգնմամբ։ Ավելին՝ հայտարարել ենք, որ ցանկանում ենք մաքուր էջից սկսել ռազմավարական գործընկերությունը, ցանկանում ենք դա անել կոնկրետ ճանապարհային քարտեզի օգնությամբ»,- ասել է նա։
Ըստ Կոբախիձեի՝ դա կարող է լինել ճանապարհային քարտեզ, որը մշակվել է ԵՄ-Վրաստան հարաբերությունների համար, օրինակ՝ ասոցացման օրակարգով։
«Ուրախ ենք, որ նոր նախագահի վարչակազմի հետ կիսում ենք ընդհանուր արժեքներ։ Շատ բան կախված կլինի նրանից, թե արդյոք Թրամփի վարչակազմը կարո՞ղ է ամբողջությամբ հաղթել ԱՄՆ-ում Deep State-ին։ Մենք, ընդհանուր առմամբ, լավատես ենք և, կրկնում եմ, լիովին պատրաստ ենք վերականգնել վրաց-ամերիկյան հարաբերությունները»,- ասել է վարչապետը։
Թբիլիսիում բողոքի ցույցերն սկսվել էին նոյեմբերի 29-ին, երբ Կոբախիձեն հայտարարել էր, որ Վրաստանի իշխանությունները ԵՄ-ի հետ բանակցություններ սկսելու հարցը չեն բարձրացնի մինչև 2028 թվականը։ 2024 թվականի դեկտեմբերի 27-ին ԱՄՆ-ն ֆինանսական պատժամիջոցներ էր կիրառել «Վրացական երազանքի» հիմնադիր Բիձինա Իվանիշվիլիի նկատմամբ, ըստ որի՝ Իվանիշվիլիի և «Վրացական երազանքի» գործողությունները քայքայել են ժողովրդավարական ինստիտուտները, թույլ են տվել ոտնահարել մարդու իրավունքները և զսպել հիմնարար ազատությունների իրականացումը Վրաստանում։
