«Հայաստան» խմբակցության կողմից Հայոց ցեղասպանության ժխտումը քրեականացնելու մասին օրինագիծ ներկայացնելուց հետո Ազգային ժողովում վեճ է սկսվել։ Իրավիճակը թեժացել է, երբ ընդդիմության և իշխանության ներկայացուցիչներն սկսել են միմյանց մեղադրել Ցեղասպանությունը և ազգային արժեքներն ուրանալու մեջ։
«Հայաստան» խմբակցության քարտուղար Արծվիկ Մինասյանը, ներկայացնելով օրինագիծը, նշել է, որ Մեծ Եղեռնի 110-րդ տարելիցին ընդառաջ խմբակցությունը շրջանառության մեջ է դրել օրինագիծ, որը վերաբերում է ազգային հիշողությանը, արժանապատվությանն ու ինքնությանը, ինչպես նաև հայ ժողովրդին ու հայազգի թշնամիներին:
Դիմելով իշխող խմբակցությանը՝ նա նշել է, որ վերջին մի քանի օրերի ընթացքում կրկին պատմությունը խեղաթյուրելու, ազգային ազատագրական պայքարը նսեմացնելու փորձեր են արվել։
«Ուզում եմ նաև հիշեցնել, որ ամեն մի խոսք պետք է բավարար հիմքեր ունենա։ Սուտն ու կեղծիքը, մեր պատմությունը խեղաթյուրելը, պայքարողին նսեմացնելը ոչ մի լավ տեղ չեն տանելու։ Հիշե՛ք՝ պատգամավորի, իշխանական կարգավիճակից դուրս կյանք կա, և պետք է դուրս գաք մարդկանց մեջ, մարդկանց հայացքներին նայեք և պետք է պատասխան տաք»,- դիմելով իշխանությանը՝ ընդգծել է Մինասյանը։
ԱԺ նախագահ Ալեն Սիմոնյանը Մինասյանի ելույթը «սեփական փորձով» կիսվել է որակել։ Իշխող «Քաղաքացիական պայմանագիր» խմբակցության ղեկավար Հայկ Կոնջորյանը «երեսպաշտություն» է անվանել Ցեղասպանության ուրացման մասին ընդդիմության նախագիծը:
«Դուք ուրացել եք Դաշնակցությանը։ Դուք ուրացել եք Սիմոն Վրացյանին, (Հովհաննես - խմբ.) Քաջազնունուն, (Ալեքսանդր - խմբ.) Խատիսյանին։ Հիմնավորեմ՝ թե ոնց եք ուրացել։ Ցեղասպանությունից ընդամենը 3 տարի անց Դաշնակցությունը գնում է Թուրքիայի հետ բարեկամության մասին պայմանագիր է կնքում։ Ցեղասպանությունից երեք տարի անց այդ պայմանագիրը կնքելը, փաստորեն, դուք ուրացում չեք համարում, բայց հիմա՝ 110 տարի անց, երեսպաշտորեն Ցեղասպանության ուրացումը քրեականացնելու նախագիծ եք բերում»,- նշել է նա։
Կոնջորյանը «Հայ հեղափոխական դաշնակցությանը» մեղադրել է Ցեղասպանությունն ուրանալու մեջ։ Նա հիշեցրել է, որ 2008-ին՝ Հայաստան-Թուրքիա ֆուտբոլային խաղի ժամանակ, երբ Հայաստան էր ժամանել Թուրքիայի նախկին նախագահ Աբդուլլահ Գյուլը, այն ժամանակվա իշխանությունը (Սերժ Սարգսյանի նախագահության ժամանակ-խմբ.) հայ ֆուտբոլիստների մարզաշապիկի վրայից հանել էր Արարատի պատկերը: Նա իր կասկածն է հայտնել «Հայաստան» խմբակցության պատգամավոր Գեղամ Մանուկյանի հայտարարության վերաբերյալ, որ «Արարատը Հայաստանի հավաքականի մարզաշապիկից թյուրիմացաբար է անհետացել»։
«Ո՞նց կարող է թյուրիմացաբար անհետանալ։ Դուք այդքան նսեմացրել ու նսեմացնում եք Արարատը, որ համարել եք՝ Արարատը կարելի՞ է թյուրիմացաբար դուրս թողնել Հայաստանի հավաքականի մարզաշապիկից։ Հիմա մե՞նք ենք Արարատն ուրանում, թե՞ դուք։ Թյուրիմացություններ, փաստորեն, ձեզ մոտ հաճախ են տեղի ունեցել։ Երևի, այդպես թյուրիմացաբար կոալիցիայի մեջ մտաք երիտթուրքերի հետ, հետո այդպես թյուրիմացաբար կոալիցիայի մեջ մտաք հանրապետականների հետ։ Հետո էլ թյուրիմացաբար դուրս եկաք կոալիցիայից ու նորից թյուրիմացաբար մտաք այդ կոալիցիայի մեջ»,- ասել է ՔՊ խմբակցության ղեկավարը։
Մարտի 13-ին թուրքական լրատվամիջոցներին տված հարցազրույցում ՀՀ վարչապետ Նիկոլ Փաշինյանը հայտարարել էր, որ Հայոց ցեղասպանության միջազգային ճանաչումը պաշտոնական Երևանի արտաքին քաղաքական առաջնահերթությունների մեջ չէ։
Ապրիլի 24-ին Օսմանյան կայսրությունում Հայոց ցեղասպանության՝ 20-րդ դարի առաջին Ցեղասպանության 110-րդ տարելիցն է։
