Սիրիայում տուժածների շրջանում ՀՀ քաղաքացիներ չկան, Armenia Today-ին հայտնել է ՀՀ ԱԳՆ մամուլի խոսնակ Անի Բադալյանը։
Նրա խոսքով՝ ՀՀ ԱԳՆ-ն հետևում է Սիրիայում զարգացումներին:
«Հալեպում ՀՀ գլխավոր հյուպատոսը կապի մեջ է տեղական իշխանությունների և համայնքային կառույցների հետ»,- նշել է Բադալյանը:
«Գանձասար»-ի տվյալներով՝ Սիրիայի Լաթաքիա քաղաքում իրավիճակը մտահոգիչ է։
«Անցնող օրերի արյունալի դեպքերը, խաղաղ բնակիչների սպանությունը վախի ու անապահովության մթնոլորտ են ստեղծել»,- հայտնել է թերթը։
Նշվում է, որ լսվում են կրակոցների ձայներ։ Դպրոցները փակ են, բնակչությունը դիմագրավում է տնտեսական դժվարությունների, ջրի սղություն է զգացվում։
Մարտի 6-ին Լաթաքիա, Տարտուս և Հոմս նահանգներում բախումներ էին սկսվել անվտանգության ուժերի և նախկին նախագահ Բաշար Ասադի կողմնակիցների զինված խմբերի միջև։ Ամենածանր բախումները տեղի են ունեցել Ջեբլա քաղաքում, որտեղ ապրում են ալավիները՝ կրոնական փոքրամասնություն, որին պատկանում է Ասադների ընտանիքը։ Մարտի 7-ին նոր իշխանությունները վերահսկողության տակ էին վերցրել Լաթաքիա քաղաքը՝ հեռացնելով Ասադի զինված կողմնակիցներին։ ԶԼՄ-ների տվյալներով՝ Սիրիայի արևմուտքում զոհերի թիվը գերազանցել է 1000-ը։
Մարտի 8-ին «Գանձասար»-ը հայտնել էր, որ Լաթաքիայի հայերին հրահանգվել է տներից դուրս չգալ, ավելի ուշ տեղեկացրել Լաթաքիայում կրակոցների հետևանքով երկու հայի զոհվելու մասին։ «Գանձասար»-ի թղթակից Նաիրի Կարապետյանն Armenia Today-ին հայտնել էր, որ զոհված հայերը պատահական էին հայտնվել կրակոցների վայրում։ Կարապետյանի խոսքով՝ Լաթաքիայում շուրջ 650 հայ ընտանիք է ապրում, հայեր են բնակվում նաև ծովեզրյա Տարտուսում և Բանիասում։
