Սիրիայի արևմուտքում զոհերի թիվը գերազանցել է 1000-ը, հայտնել է AP-ն՝ հղում անելով Մարդու իրավունքների դիտորդական սիրիական կենտրոնին։
Զոհերից, ըստ տեղեկությունների, 745-ը խաղաղ բնակիչներ են, որոնք, հիմնականում, սպանվել են մոտ տարածությունից կրակոցի հետևանքով։ Զոհվել են նաև կառավարական անվտանգության ուժերի 125 անդամ և 148 գրոհային՝ կապված Սիրիայի նախկին նախագահ Բաշար ալ-Ասադի հետ:
Նշվում է, որ Լաթաքիա քաղաքի շրջակա տարածքներում անջատվել է էլեկտրականությունն ու ջուրը։ Կենտրոնի ղեկավար Ռամի Աբդուրահմանն ասել է, որ տեղի ունեցածն ամենախոշոր զանգվածային սպանություններից մեկն է ողջ սիրիական հակամարտության ընթացքում։ Նա պնդել է, որ մարտի 8-ի վաղ առավոտյան խաղաղ բնակիչների սպանությունները դադարեցվել են։
Գործակալության տվյալներով, որը վկայակոչում է ալավիական կրոնական փոքրամասնության ներկայացուցիչներով բնակեցված գյուղերի բնակիչներին, սուննի զինյալները փողոցներում կամ տների դարպասների մոտ գնդակահարել են ալավիներին, հիմնականում՝ տղամարդկանց: Ալավիների բազմաթիվ տներ թալանվել են, ապա՝ հրկիզվել:
Սիրիայի հյուսիս-արևմուտքում գտնվող Տարտուս նահանգի Բանիյաս քաղաքի բնակիչները նշել են, որ սպանվածների մարմիններն սփռված են փողոցներում, տներում և տանիքներում, և ոչ ոք չի կարող դրանք վերցնել:
Սիրիայի պետական լրատվական գործակալությունը հաղորդել է, որ կառավարական զորքերը վերականգնել են վերահսկողությունը շրջանի մեծ մասի վրա: Պաշտպանության նախարարության ներկայացուցիչը հավելել է, որ իշխանությունները փակել են ափամերձ շրջան տանող բոլոր ճանապարհները։
Լիբանանցի պատգամավոր Հայդար Նասերը հայտարարել է, որ մարդիկ փախչում են Սիրիայից՝ Լիբանանում անվտանգություն փնտրելու նպատակով, չնշելով, սակայն, փախստականների ստույգ թիվը։ Նասերի խոսքով՝ Ասադի տապալումից հետո շատ ալավիներ հեռացվել են աշխատանքից, իսկ որոշ նախկին զինվորականներ, ովքեր սկզբում հաշտվել էին նոր կառավարության հետ, սպանվել են։
Սիրիայում զինված հակամարտությունն սկսել էր 2011 թվականից։ Զինադադարը խախտվել էր 2024-ի նոյեմբերի 27-ին, երբ սիրիական մի շարք խմբավորումների զինյալներ՝ «Հայաթ Թահրիր ալ-Շամ» իսլամիստական խմբավորման գլխավորությամբ, հարձակում էին սկսել երկրի հյուսիս-արևմուտքում կառավարական ուժերի դեմ: Նրանք մեկ շաբաթվա ընթացքում գրավել էին երկրի բոլոր խոշոր քաղաքները՝ Հալեպը, Համան, Հոմսը և Դամասկոսը: Ավելի ուշ՝ դեկտեմբերին, այս խմբերը ձևավորել էին նոր կառավարություն:
Հունվարի 13-ին «Գանձասար» թերթի խմբագիր Զարմիկ Պողիկյանն Armenia Today-ին հայտնել էր, որ հայկական համայնքի նկատմամբ նոր իշխանությունների վերաբերմունքը շատ հարգալից է։
Մարտի 6-ին Լաթաքիա, Տարտուս և Հոմս նահանգներում բախումներ էին սկսվել անվտանգության ուժերի և նախկին նախագահի կողմնակիցների զինված խմբերի միջև։ Ամենածանր բախումները տեղի են ունեցել Ջեբլա քաղաքում, որտեղ ապրում են ալավիները՝ կրոնական փոքրամասնություն, որին պատկանում է Ասադների ընտանիքը։ Մարտի 7-ին նոր իշխանությունները վերահսկողության տակ էին վերցրել Լաթաքիա քաղաքը՝ հեռացնելով Ասադի զինված կողմնակիցներին։ Բախումների հետևանքով զոհվել էր շուրջ 200 անձ։ Մարտի 8-ին «Գանձասար»-ը հայտնել էր, որ Լաթաքիայի հայերին հրահանգվել է տներից դուրս չգալ, ավելի ուշ տեղեկացրել Լաթաքիայում կրակոցների հետևանքով երկու հայի զոհվելու մասին։
