Մենք չենք պատրաստվում «քաղաքական ապահարզան» տալ որևէ գործընկերոջ, մայիսի 19-ին Լիտվայի ԱԳ նախարար Կեստուտիս Բուդրիսի հետ համատեղ ասուլիսի ժամանակ հայտարարել է ԱԳ նախարար Արարատ Միրզոյանը։
ՌԴ նախագահ Վլադիմիր Պուտինը մայիսի 9-ին հայտարարել էր, որ Հայաստանը պետք է հնարավորինս շուտ կողմնորոշվի ԵՄ-ին կամ ԵԱՏՄ-ին անդամակցության հարցում։ Այդ դեպքում, ըստ նրա, հնարավոր է «փափուկ և ինտելիգենտ ապահարզանի» ուղին։
Հայաստանի արտգործնախարարն ընդգծել է, որ դիվանագիտությունն ու քաղաքականությունը նմանատիպ «ապահարզաններ» չեն ճանաչում։
«Նպատակ չունենք լարվածություն մտցնել հայ-ռուսական հարաբերություններում։ Մենք գործընկերներ ենք՝ կապված բազմաթիվ թելերով, և տրամադրված ենք առողջ քննարկումների միջավայրում զարգացնել փոխշահավետ հարաբերություններ»,- հայտարարել է Միրզոյանը՝ չբացառելով, որ խնդիրներ կան, ինչպես բոլոր երկրների ցանկացած հարաբերություններում։
Ըստ Միրզոյանի՝ Եվրասիական տնտեսական միությանն (ԵԱՏՄ) ու Եվրոպական միությանն (ԵՄ) անդամակցություններն անհամատեղելի են, այս պահին Հայաստանը շարունակում է մերձեցումը ԵՄ-ի հետ։
«Երբ գա պահը և հարցը հասունանա, կկայացնենք համապատասխան որոշում, թե որ երկրների «ընտանիքին» ենք անդամակցելու։ Այստեղ որևէ նորություն չկա, և մենք դրսից հուշումների կարիք չունենք»,- ընդգծել է նա։
Վարչապետ Նիկոլ Փաշինյանը մայիսի 11-ին նույնպես հայտարարել էր, որ համաձայն չէ քաղաքականության մեջ «ապահարզան» ձևակերպման հետ։
Ապրիլի 1-ին Փաշինյան-Պուտին հանդիպման ընթացքում ՌԴ նախագահը հայտարարել էր՝ Եվրամիության հետ մաքսային միության մեջ լինելն ու ԵԱՏՄ-ն իրար հետ հնարավոր չեն: Փաշինյանն արձագանքել էր, որ քանի դեռ հնարավոր է այդ երկու օրակարգը համատեղել, Երևանը կհամատեղի: Ավելի ուշ ՌԴ փոխվարչապետ Ալեքսեյ Օվերչուկն զգուշացրել էր, որ ՀՀ-ն շատ մոտ է այն կետին, երբ ՌԴ-ն ստիպված կլինի այլ կերպ կառուցել տնտեսական հարաբերությունները։
