Ադրբեջանի նախագահի օգնական Հիքմեթ Հաջիևը հայտարարել է Հայաստանի հետ սահմանին գտնվող «Զանգեզուրի միջանցքի» աշխատանքների ավարտի մասին։
Ադրբեջանցի պաշտոնյան տեսանյութը տարածել է X սոցիալական ցանցում և գրել. «Զանգեզուրի միջանցքի հատվածի կառուցումը՝ դեպի Ադրբեջան-Հայաստան սահման, մոտենում է ավարտին։ Ադրբեջանը տեղում մեծ աշխատանք է կատարում՝ տարածաշրջանային տրանսպորտային և լոգիստիկ կապեր հաստատելու համար»։
Օգոստոսի 8-ին Վաշինգտոնում Հայաստանի և Ադրբեջանի ղեկավարները ԱՄՆ-ի միջնորդությամբ հռչակագիր էին ստորագրել, որով նախատեսվում է ստեղծել Սյունիքով անցնող ճանապարհ, որն ապաշրջափակվելու է «Միջազգային խաղաղության և բարգավաճման համար Թրամփի ուղի» (TRIPP) ծրագրով։ Երթուղին պետք է Ադրբեջանը միացնի Նախիջևանին Հայաստանի հարավով և գտնվի ամերիկյան կոնսորցիումի կառավարման ներքո։
ՄԱԿ-ի Գլխավոր ասամբլեայում ելույթ ունենալով՝ ՀՀ վարչապետ Նիկոլ Փաշինյանը կոչ էր արել Ադրբեջանի նախագահ Իլհամ Ալիևին պարզաբանել «Զանգեզուրի միջանցքի» վերաբերյալ իր հայտարարությունները։ Ալիևը, նույն ամբիոնից ելույթ ունենալով, հայտարարել էր, որ TRIPP նախագիծը կապահովի «անարգել անցում» «Զանգեզուրի միջանցքով»։
Հոկտեմբերի 1-ին Փաշինյանը հայտարարել էր, որ այսպես կոչված՝ «Զանգեզուրի միջանցքը» որևէ կապ չունի Հայաստանի հետ, և նախագիծը վերաբերում է Հորադիզ-Զանգիլան ճանապարհին, որը գտնվում է Ադրբեջանի տարածքում։
