Միասնական ազգային սահմանադրական կուսակցությունը (ՄԱՍԿ) նոր համագումար կանցկացնի ու թերությունները շտկած՝ կդիմի Արդարադատության նախարարության պետական ռեգիստր, հայտնել է «Հրապարակ» օրաթերթը։
Ավելի վաղ պետռեգիստրը մերժել էր գրանցել ՔՊ նախկին, այժմ անկախ պատգամավորներ Հովիկ Աղազարյանի և Հակոբ Ասլանյանի հիմնած նոր կուսակցությունը։
Պետռեգիստրից նրանք դիտողություններ էին ստացել, և հոկտեմբերի 4-ին նոր համագումար են հրավիրելու, որպեսզի շտկեն մատնանշված թերացումները, հիշեցրել է լրատվականը։
ԶԼՄ-ի տեղեկությամբ՝ համագումարը կանցկացվի Կույրերի միավորման շենքում, որը դահլիճի վարձակալության համար անհամեմատ ավելի համեստ գներ է պահանջում, քան «Մարիոթ» հյուրանոցը, ինչպես նախորդ համագումարին էր։
2024 թվականի հոկտեմբերին ՔՊ-ն Աղազարյանին հեռացրել էր իր շարքերից, երբ վերջինս հրաժարվել էր ՀՀ վարչապետ Նիկոլ Փաշինյանի պահանջով վայր դնել իր մանդատը։ Փետրվարին Աղազարյանն ու Ասլանյանն ստեղծել էին Միացյալ ազգային սահմանադրական կուսակցությունը։
Ապրիլի 28-ին «Արթուն ենք» շարժումը նամակներ էր փոխանցել ԱԺ պատգամավորներին՝ Փաշինյանին անվստահություն հայտնելու գործընթացի առաջարկով։ ԱԺ անկախ պատգամավորներ Աղազարյանն ու Ասլանյանն Armenia Today-ին հայտնել էին, որ չեն մասնակցի այս գործընթացին։
Մայիսի 9-ին ՄԱՍԿ-ը հայտարարել էր, որ նախաձեռնում է Փաշինյանին անվստահություն հայտնելու գործընթաց։ Հունիսի 3-ին Աղազարյանն Armenia Today-ին հայտնել էր, որ կուսակցության գրանցումը մերժվել է։
