Բացառում եմ վարչապետի իմփիչմենթի՝ քաղաքական օրակարգից դուրս գալը, եթե անգամ հասնենք 2026 թվականի խորհրդարանական ընտրություններին, լրագրողներին հայտնել է «Արթուն ենք» շարժման ներկայացուցիչ Նարեկ Մալյանը։
Ըստ նրա՝ իրավիճակի հանգուցալուծման երեք եղանակ կա։
«Տարբերակ առաջին՝ երբ ընդդիմադիր երկու խմբակցություններն, ի վերջո, մի կողմ կթողնեն իրենց տարաձայնությունները, անձնական ամբիցիաները, որը հստակ արտահայտվում է գոնե խմբակցություններից մեկի կողմից, և կառաջադրեն միասնական թեկնածու, որի շուրջ բոլորս կհամախմբվենք և աշխատանք կտանենք։
Տարբերակ երկրորդ՝ եթե խմբակցություններից մեկը, մասնավորապես՝ «Հայաստան» խմբակցությունը, շարունակի այս գործելաոճը, որով աշխատում է, այսինքն՝ ներսից տորպեդահարում իրականացվի, մյուս կուսակցությունն առաջադրի թեկնածու, արդեն ոչ մասնակցային եղանակով «Հայաստան»-ն էլ միանա գործընթացին, և կսկսվի միասնականության, համախմբման գործընթաց։ Սա ինձ համար ոչ ցանկալի տարբերակ է։
Եվ երրորդ տարբերակը՝ երբ մեր երկու ընդդիմադիր խմբակցությունները հրաժարվեն իրենց բուն խոստումից, դա Փաշինյանին հեռացնելու խոստումն է, այս դեպքում՝ հանրությունն իր ուժերով առաջադրի թեկնածու, և բոլոր 107 պատգամավորների համար կսկսվի պարտադիր կամավոր սկզբունքով ստորագրահավաքը»,- պարզաբանել է Մալյանը։
Ըստ նրա՝ այս պահին ակտիվ բանակցություններ են ընթանում ընդդիմադիր դաշտում։ Մի քանի օրից շարժումը կիմանա թեկնածուների հետ բանակցությունների արդյունքները և կմտնի կիրառական փուլ։
Ընդդիմադիր «Պատիվ ունեմ» դաշինքը պատրաստակամություն էր հայտնել աջակցել այս նախաձեռնությանը, մինչդեռ «Հայաստան» դաշինքը կասկածի տակ էր դրել նախաձեռնության հեղինակների անկեղծությունն ու Փաշինյանին հեռացնելու համար նախ փողոցային ճնշումների կոչ էր արել:
«Քաղաքացիական պայմանագիր» խմբակցությունից ավելի վաղ դուրս եկած պատգամավորներ Հակոբ Ասլանյանն ու Հովիկ Աղազարյանը վարչապետի պաշտոնում առաջարկել էին ՀՀ հատուկ հանձնարարարություններով նախկին դեսպան Էդմոն Մարուքյանի թեկնածությունը, և բանակցություններ սկսել խորհրդարանական խմբակցությունների հետ:
