Երևանի Նոր Նորք վարչական շրջանի ղեկավար Տիգրան Տեր-Մարգարյանը դադարեցնում է լիազորությունները: Նա այս մասին հայտարարել է մայիսի 19-ի Երևանի քաղաքապետարանի գործակարգավարական խորհրդակցության ժամանակ, որը հեռարձակել է Armenia Today-ը YouTube-ի իր ալիքում:
«Խոսքս ուզում եմ ևս մեկ անգամ ուղղել Ազգային ժողովում ծվարած որոշ մանդատագողերին, 2026 թվականը սարերի հետևում չէ, մենք հանդիպելու ենք 2026 թվականին, և ես մասնակիցն եմ լինելու ձեր քաղաքական վախճանին»,- ասել է նա:
Քաղաքապետ Տիգրան Ավինյանը ողջունել է պաշտոնից հեռանալու որոշումը. «Մեր աշխատանքը ենթադրում է զսպվածություն, նաև այն պայմաններում, երբ մեզ անընդհատ սադրում են: Այդ սադրանքներն անընդհատ և անդադար շարունակվելու են: Այն տեղերում, որտեղ անձինք պաշտոնյաների նկատմամբ անհարգալից վերաբերմունք կցուցաբերեն, և այն կանցնի քրեական օրենսգրքի որոշ հոդվածներով, վստահեցնում եմ, բոլորիս ուշադրությունը սևեռված է լինելու նման վարքագծին»:
Տեր-Մարգարյանի հրաժարականը հետևում է նրա մասնակցությամբ միջադեպին. ապրիլի 29-ին ակտիվիստ Արթուր Չախոյանը հայտարարել էր, որ Նոր Նորք վարչական շրջանի ղեկավարն սպառնացել, հայհոյել է իրեն և Երևանի ավագանու «Մայր Հայաստան» խմբակցության անդամ Մեսրոպ Մանուկյանին։ Վերջիններս թաղապետի նկարի վրա հեղուկ էին լցրել։ Չախոյանն ապրիլի 29-ին գրել էր, որ գնալու է թաղապետարան՝ հանրային քննարկմանը մասնակցելու նպատակով:
Ապրիլի 30-ին, երբ Չախոյանն այցելել էր թաղապետարան, ծեծկռտուք էր տեղի ունեցել վարչական շրջանի ղեկավարի, նրա աջակիցների և Չախոյանի միջև, որից հետո վերջինիս ոստիկանությունից վնասվածքներով տեղափոխել էին հիվանդանոց, այնուհետ մեղադրանք առաջադրել։ Մեղադրանք էր առաջադրվել նաև Տեր-Մարգարյանին։ Քննչական կոմիտեից մայիսի 2-ին ArmeniaToday-ին տեղեկացրել էին, որ թաղապետարանում միջադեպերի վարույթներով 6 անձի նկատմամբ բացակայելու արգելք է կիրառվել։
