Ի հեճուկս բոլոր ներքին և արտաքին սադրանքների՝ Հայաստանի և Ադրբեջանի միջև պատերազմ չի ՛ լինելու, լինելո՛ւ է խաղաղություն, Մայիսի 9-ի առիթով իր ուղերձում հայտարարել է վարչապետ Նիկոլ Փաշինյանը:
Շեշտելով, որ Հայաստանը գնում է ազատության, ժողովրդավարության, խաղաղության ճանապարհով, նա նկատել է՝ սա էլ հեշտ ճանապարհ չէ, բայց այն արժե անցնել։
«Այդ ճանապարհն անցնելու համար անհրաժեշտ է համարձակ, անկեղծ և ամբողջական ինքնահայեցում, սեփական պատմությունը կարդալու, սերտելու և մեր պատմությունից մեզ ուղղվող ուղերձներն ընթերցելու և ընկալելու կարողություն»,- նշել է նա։
Իր մայիսիննյան ուղերձում երկրի ղեկավարը կրկին անդրադարձել է «Իրական Հայաստանի» գաղափարախոսությանը՝ այն չափազանց կարևոր գործընթաց անվանելով։
«Իրական Հայաստանի գաղափարախոսությունը հենց մեր պատմությունն ընթերցելու և վերընթերցելու արդյունք է, Իրական Հայաստանի գաղափարախոսությունը Պատմական Հայաստանի՝ մեզ ուղղված ուղերձների ընթերցման արդյունք է, որը մեզ ասում է․ մի՛ գնացեք իմ ճանապարհով, այլ կենտրոնացեք մեր երազանքների երկրում` Հայաստանի Հանրապետությունում ազատություն, երջանկություն, բարեկեցություն կառուցելու, և այդ երջանիկ պետությունը սերնդեսերունդ փոխանցելու խնդրի վրա։ Այսօր մենք ունենք այդ հնարավորությունը և պարտավոր ենք իրացնել այդ հնարավորությունը»,- Փաշինյանը։
Վարչապետի համոզմամբ՝ այսօր կա նաև հարավկովկասյան տարածաշրջանի խաղաղ ու բարեկեցիկ ապագայի գործում «մեր բաժին ներդրումն ունենալու» հնարավորություն:
«Հայաստանի և Ադրբեջանի միջև Խաղաղության և միջպետական հարաբերությունների հաստատման մասին համաձայնագրի նախագիծը համաձայնեցված է և սպասում է ստորագրման, ու մենք գնալու ենք այդ ճանապարհով։ Մեր տարածաշրջանը վաստակել է խաղաղության ու բարեկեցության մեջ ապրելու իրավունքը և այդպես էլ պետք է լինի»,- հայտարարել է Փաշինյանը։
Մարտի 13-ին Ադրբեջանի ԱԳ նախարար Ջեյհուն Բայրամովը հայտարարել էր, որ խաղաղության պայմանագրի տեքստի շուրջ բանակցությունների գործընթացն արդեն ավարտված է։ Պաշտոնական Երևանը հաստատել էր նախագծի հաստատման ավարտը, ավելին՝ հայտարարել, որ պատրաստ է Բաքվի հետ սկսել խորհրդակցություններ համաձայնագրի ստորագրման ժամկետների և վայրի շուրջ։ Մարտի 14-ին արտգործնախարար Արարատ Միրզոյանը որոշ մանրամասներ էր ներկայացրել խաղաղության պայմանագրի դրույթների մասին։ «Հարսանիք լեռներում».
Կարդացեք նաև՝ «Հարսանիք լեռներում». Շուշիի ազատագրման 33-ամյակը
