ԱԺ անկախ պատգամավորներ Հովիկ Աղազարյանը, Հակոբ Ասլանյանն ու Գեղամ Նազարյանը չեն մասնակցի վարչապետի իմպիչմենթի գործընթացին, որը նախաձեռնել է «Արթուն ենք» շարժումը՝ ի դեմս Էդգար Ղազարյանի ու Նարեկ Մալյանի։ Նրանք իրենց որոշման մասին հայտնեցին Armenia Today-ին, անկախ պատգամավոր Իշխան Զաքարյանի հետ կապ հաստատել չհաջողվեց։
Խորհրդարանի 107 պատգամավորներին իմպիչմենթի գործընթաց նախաձեռնելու նամակներ էին փոխանցվել՝ դրանց կից որոշման նախագծով, որում բացակայում է միայն վարչապետի թեկնածուի անունը։ Նախագիծը ԱԺ բերելու համար անհրաժեշտ է 36 քվե, որից միայն 34 կարող են ապահովել ընդդիմադիր 2 խմբակցությունները միասին։
Աղազարյանի խոսքով՝ նախաձեռնությունը մինչև վերջ պարզ չէ, հետևաբար հստակ չէ, թե ինչին պետք է միանա կամ չմիանա։
«Հեղինակներն ասում են, որ պատգամավորները պետք է նախաձեռնություն ունենան և թեկնածու առաջադրեն, իսկ ընդդիմությունն այդպիսի նախաձեռնություն ցուցաբերե՞լ է, թե՞ ոչ։ Իրենք թեկնածուի անուն չեն տվել։ Եթե նրանք հանդես գային թեկնածուի անուն տալով՝ մենք քննարկման առարկա կդարձնեինք։ Իսկ եթե թեկնածուի անուն տան «Հայաստան» կամ «Պատիվ ունեմ» դաշինքը, մենք այդ հարցը չենք էլ քննարկելու, քանի որ նախապես հայտարարել ենք, որ Ռոբերտ Քոչարյանի և Սերժ Սարգսյանի հետ փոխկապակցված ոչ մի ուժի նախաձեռնությանը չենք միանալու»,- պարզաբանեց Աղազարյանը։
Ասլանյանն իր հերթին հայտնեց, որ չի մասնակցի այդպիսի պրոցեսի, քանի որ խորհրդարանական ընտրություններին ընդամենը մեկ տարի է մնացել։
«Պետք է լրջորեն սպասել և հստակ ապացուցել, թե ով է արժանի ժողովրդի վստահությանը։ Մենք հայտարարել ենք, որ ամեն ինչ անելու ենք, որ Նիկոլ Փաշինյանը նորից չընտրվի, բայց մենք մեր պետության շահերին դեմ չենք գնա։ Այսօր այդ պրոցեսը սկսելը պետության շահերի դեմ է այս խառը ժամանակներում։ Եթե 3-4 տարի մնացած լիներ՝ խնդրեմ, բայց ընդամենը 1 տարի է մնացել, ենթադրենք ընտրությունները նշանակվեն ապրիլ ամսին, որքանո՞վ ծախսերն արդարացված կլինեին»,- ասաց պատգամավորը։
Ասլանյանը հիշեցրեց, որ որպես ՄԱՍԿ կուսակցությունը չի օժանդակի ՀՀ երկրորդ ու երրորդ նախագահների հետ փոխկապակցված ոչ մի ուժի նախաձեռնությանը։ «Որպես ՄԱՍԿ փոխնախագահ շատ կտրուկ ձևով կասեմ, որ երբեք այդ առանցքի կողքին չենք կանգնի»,- շեշտեց նա։
Պատգամավոր Գեղամ Նազարյանը տեղեկացրեց, որ նախաձեռնության մասին տեղեկություն չունի։
«Անլուրջ մարդկանց նամակներով առավել ևս չեմ հետաքրքրվում։ Իմպիչմենթի լուրջ գործընթացը անլուրջ մարդկանց մոտեցմամբ դառնում են ալուրջ։ Անլուրջ մարդկանց անլուրջ խաղերով չեմ զբաղվում»,- ընդգծեց նա։
Ապրիլի 28-ին «Արթուն ենք» շարժումը նամակներ էր փոխանցել ԱԺ պատգամավորներին՝ Նիկոլ Փաշինյանի իմփիչմենթի առաջարկով։
