ՀՀ երկրորդ նախագահ Ռոբերտ Քոչարյանը փետրվարի 17-ին կայացած ասուլիսում հայտարարել է, որ վարչապետ Նիկոլ Փաշինյանին ընտրությունների միջոցով հաղթելու տարբերակը հնարավոր է համարում։
Նա նշել է, որ աշխարհում չկա մեկը, որին անհնար է չհաղթել ընտրությունների միջոցով։
«Փաշինյանն անհաղթելի առաջնորդ չէ»,- ասել է նա՝ վտանգավոր համարելով թեզը, թե Փաշինյանի իշխանությանն անհնար է հաղթել ընտրություններով։
Անդրադառնալով ընդդիմության վարկանիշին՝ Քոչարյանը համաձայնել է լրագրողի դիտարկման հետ, որ այն ցածր է։
«Այո, ընդդիմության վարկանիշը ցածր է, բայց չեմ կարծում, թե այն այդպես է մնալու»,- համոզմունք է հայտնել երկրորդ նախագահը։
Նա ընդգծել է, որ դեռ հայտնի չէ, թե ընդդիմությունն առաջիկա՝ 2026-ի խորհրդարանական ընտրություններին ինչ ֆորմատով է մասնակցելու։ Այդուհանդերձ, Քոչարյանը հնարավոր չի համարել ընդդիմության լայն կոնսոլիդացիան։
Հունվարի 20-22-ը MPG Gallup-ի անցկացրած հարցման արդյունքներով՝ «Քաղաքացիական պայմանագիրն» ստացել էր ամենացածր միավորները (11,3%)։ Հունվարի 25-ին Փաշինյանը «Հանրային հեռուստաընկերության» եթերում հայտարարել էր, որ արտահերթ ընտրություններ անցկացնելու ծրագրեր չկան։ Իր վարկանիշի անկումը Փաշինյանը հունվարի 31-ին պարզաբանել էր նրանով, որ «քաղաքականությունն այդպիսի բան է՝ վարկանիշը նվազում է, աճում է, երբեմն նվազում է ու երբեք չի աճում, բայց այդպես չի լինում, որ աճում է ու էլ երբեք չի նվազում»։
Հունվարի 31-ին վարչեպատը պատասխանելով Armenia Today-ի հարցին, թե արդյոք պատրաստվում է իր տիկին Աննա Հակոբյանը գլխավորել ՔՊ ցուցակը 2026 թվականի խորհրդարանական ընտրություններին, ասել էր, որ նման մտադրություն չունի։
