Դեկտեմբերի 10-12-ը Հայաստանում տեղի կունենա Սևծովյան տնտեսական համագործակցության խորհրդարանական վեհաժողովի գլխավոր ասամբլեայի 64-րդ լիագումար նիստը, հայտնում է կազմակերպության կայքը։
Դեկտեմբերի 10-ին տեղի կունենան միջխորհրդարանական կազմակերպության Բյուրոյի 70-րդ և Մշտական հանձնաժողովի 64-րդ նիստերը, իսկ դեկտեմբերի 11-ին և 12-ին` ՍԾՏՀ ԽՎ 64-րդ նստաշրջանը:
ՍԾՏՀ ԽՎ-ն իր նիստերն անցկացնում է տարին երկու անգամ: Դրանցում մասնակիցները գնահատում են ՍԾՏՀ-ի գործունեությունը, ընդունում հաշվետվություններ և առաջարկություններ, հռչակագրեր և որոշումներ: Այս փաստաթղթերը ներկայացվում են ՍԾՏՀ Արտաքին գործերի նախարարների խորհրդի նիստերին, անդամ երկրների ազգային խորհրդարաններին և կառավարություններին, ինչպես նաև միջազգային կազմակերպություններին:
Հյուրընկալող երկրի նախագահը, տասներեք անդամ երկրների խորհրդարանների նախագահները և ՍԾՏՀ նախագահը հրավիրված են ՍԾՏՀ ԽՎ Գլխավոր ասամբլեային: 2024 թվականին ՍԾՏՀ ԽՎ նախագահը Թուրքիայի ներկայացուցիչ Մուստաֆա Սենթոփն էր, իսկ գլխավոր քարտուղարը՝ ադրբեջանցի Ասաֆ Հաջիևը։
Նիստեր Երևանում տեղի էին ունեցել նաև 2000, 2006, 2012 և 2018 թվականներին։ 2001 թվականից Ստամբուլում գործում է ՍԾՏՀ-ում Հայաստանի մշտական ներկայացուցչությունը։ 2024 թվականից առաքելությունը ղեկավարում է Նաիրի Պետրոսյանը։
Մայիսին Տիրանայում ՍԾՏՀ ԽՎ գլխավոր ասամբլեայի 63-րդ լիագումար նիստում կազմակերպության նախագահությունն Ալբանիայից անցել էր Հայաստանին։
