«Ազատազեն» կազմակերպության համահիմնադիր, 44-օրյա պատերազմի մասնակից Իշխան Գևորգյանը կառավարության շենքի մոտ 72-ժամյա նստացույց է սկսել։ Գևորգյանն ընդգծել է, որ համաձայն չէ Տավուշի մարզում Ադրբեջանին տարածքներ հանձնելու հարցում իշխանությունների գործողությունների հետ։ Նրա խոսքով՝ «մեր պետության տարածքները թշնամուն հանձնելը սահմանադրական կարգի տապալում է»։
Նա նաև նշել է, որ վստահում է Հայ առաքելական եկեղեցու Տավուշի թեմի առաջնորդ Բագրատ Գալստանյանին։ «Համոզված եմ, որ հողերն ուղղակի հանձնելու պրոցեսն իրականացնելու դեպքում է՛լ ավելի մեծ ռիսկերի ու անվտանգային խնդիրների ենք բախվելու»,- ընդգծել է Գևորգյանը։
ՀՀ ԱԳՆ-ն ապրիլի 19-ին հայտարարել էր, որ Հայաստանն ու Ադրբեջանը պայմանավորվել են սահմանազատման գործընթացն սկսել Տավուշի մարզից, ինչից հետո Տավուշի սահմանամերձ գյուղերի բնակիչները բողոքի ակցիաներ էին սկսել։ Ակցիաների պատճառ էր դարձել նաև վարչապետի աշխատակազմի՝ ավելի ուշ արված հայտարարությունը, ըստ որի սահմանազատումից հետո Զինված ուժերը նշված հատվածների շրջանում իրենց տեղը կզիջեն սահմանապահ զորքերին։ Ապրիլի 19-ից մեկնարկած ակցիաները հաջորդող օրերին սկսվել են նաև ՀՀ այլ մարզերում։ Հայաստանի և Ադրբեջանի սահմանին կոորդինատների ճշգրտման աշխատանքների շրջանակներում գեոդեզիական չափումների հիման վրա ապրիլի 29-ի դրությամբ 35 սահմանային սյուն է տեղադրվել։
Մանրամասները՝ տեսանյութում։
