Մայոր Արամ Նավասարդյանը մեղավոր է ճանաչվել 2022 թվականին վարչապետի շարասյանն ուղեկցած առաջին մեքենայի հարվածից մահացած Սոնա Մնացականյանի գործով: Նրա նկատմամբ խափանման միջոցը մնացել է անփոփոխ՝ երկրից բացակայելու արգելքը:
«Վերդիկտի հետ կապված տուժող կողմն առարկություններ չունի, որովհետև ամբողջ մեղադրանքով ու ծավալով մեղավոր է ճանաչվել: Դատարանն այս պահին լուծել է միայն մեղավորության հարցը, ինչից տուժող կողմը, բնականաբար, գոհ է այն իմաստով, որ դատարանի կայացրած վերդիկտը բխում է գործով հավաքված և դատարանում հետազոտված ապացույցների ծավալից»,- լրագրողներին ասել է տուժողի իրավահաջորդի ներկայացուցիչ, փաստաբան Րաֆֆի Ասլանյանը:
Նրա փոխանցմամբ՝ դեռ պարզ չէ Նավասարդյանի պատժաչափի հարցը, դա կքննարկվի հաջորդ դատական նիստին՝ օգոստոսի 13-ին: Նավասարդյանին առաջադրվել է երկու մեղադրանք՝ երթևեկության կանոնների խախտմամբ մահվան ելքով վրաերթ, որով նախատեսում է մինչև 5 տարվա ազատազրկում, ինչպես նաև մինչև 3 տարի վարելու կամ պաշտոն զբաղեցնելու իրավունքի սահմանափակում, և վթարի վայրը լքել: Այս արարքը նախկինում պատժվում էր տուգանքով, ուղղիչ աշխատանքով կամ մինչև 2 ամիս կալանքով, նոր Քրեական օրենսգրքում չի համարվում քրեական հանցանք:
Ինչ վերաբերում է պաշտպանական կողմի մեկնաբանություններին Սոնա Մնացականյանի՝ ճանապարհային երթևեկելի գոտի մտնելու վերաբերյալ, թե վտանգն առաջացել է հետքայլի պահին, ապա փաստաբանը նշել է. «Այսինքն՝ եթե մարդը մտնում է երթևեկելի գոտի, ուրեմն վարորդը պետք է նույն արագությամբ շարժվի՞՝ մտածելով, որ «կանցնի դիմացովս», բայց փորձագետները պնդել են, որ վտանգն առաջանում է, երբ ոտքը դնում է երթևեկելի գոտի, հետևաբար՝ հետիոտնի գործողություններն անկանխատեսելի են: Վարորդը կռահելու կարիք չունի, պարտավոր է արգելակել»:
2022-ի ապրիլի 26-ին Երևանի Պարոնյան-Լեո փողոցների խաչմերուկում վարչապետ Նիկոլ Փաշինյանի ավտոշարասյանն ուղեկցող ՃՈ ավտոմեքենան մահացու վրաերթի էր ենթարկել հղի Մնացականյանին, ինչից հետո մեքենաներից որևէ մեկը կանգ չէր առել։ ՃՈ մեքենայի վարորդը ձերբակալվել էր, ապա ազատ արձակվել։ Ըստ մեղադրանքի՝ վրաերթի ենթարկելուց հետո Նավասարդյանը թողել էր դեպքի վայրը և հեռացել։ 2024-ի դեկտեմբերին Երևանի ընդհանուր իրավասության դատարանն անօրինական էր համարել հղի կնոջը մահացու վրաերթի ենթարկելու գործով Փաշինյանի ավտոշարասյան ղեկավար կազմի նկատմամբ քրեական հետապնդում չհարուցելու որոշումը։
Փաշինյանը մամուլի ասուլիսում հայտարարել էր, որ Մնացականյանի վրաերթի դեպքով որևէ պատասխանատվություն չունի, քանի որ իրեն ուղեկցող ավտոշարասյան մեջ սովորական քաղաքացու նման «ավտոբուսի» ուղևոր էր։
