Վերաքննիչ քրեական դատարանը «Տաշիր» ընկերությունների խմբի նախագահ Սամվել Կարապետյանի պաշտպանության խորհրդին է փոխանցել գործարարի կալանքն անփոփոխ թողնելու մասին դատավոր Արմեն Դանիելյանի որոշումը, որը փաստաբաններն անբովանդակ և «իրավական աբսուրդ» են որակել։
Նրանք մեջբերել են դատական ակտից մի հատված, որը վերաբերում է «Կարապետյանին մեղսագրվող արարքի հետ իբրև առնչվելու հիմնավոր կասկածի հերքմանը»:
«Վերաքննիչ դատարանը գտնում է, որ բարձրացված հարցադրումները շատ ավելի խորն են, ինչին տվյալ դեպքում հիմնավոր կասկածի տեսանկյունից հնարավոր չէ անդրադառնալ»: Այսինքն, ըստ դատարանի, քանի որ հարցադրումները հիմնավոր կասկածի հերքմանն ուղղված «խորն են», դրա համար ոչ թե արձանագրվում է հիմնավոր կասկածի բացակայությունը, այլ անփոփոխ է թողնվում դատական ակտը՝ առանց որևէ բովանդակային իրավական փաստարկ ներկայացնելու»,- ընդգծել են պաշտպանները։
Փաստաբանները շեշտել են, որ նման «իրավական» դատողությունների հետևանքով Դանիելյանից արդար դատաքննության ակնկալիք չունեն։ Պաշտպանության խորհրդի դիտարկմամբ՝ դատավորի որոշման պատճառաբանությունները նորից փաստում են, որ գործի հիմքում քաղաքական հետապնդումն է։
Հունիսի 19-ին դատարանը երկու ամսով կալանավորել էր Կարապետյանին իշխանությունը զավթելու կոչեր հնչեցնելու մեղադրանքով, երբ նա քննադատել էր Ամենայն Հայոց կաթողիկոսի և հոգևորականների դեմ Հայաստանի իշխանությունների արշավը: Փաշինյանը խիստ էր արձագանքել Կարապետյանի հայտարարությանը: Գործարարը չի ընդունում մեղադրանքը և մտադիր է բողոքարկել այն եվրոպական դատարանում: Հուլիսի 4-ին դատարանն անփոփոխ էր թողել Կարապետյանին կալանավորելու որոշումը։
Կարդացեք նաև՝
Ինչո՞ւ են Սամվել Կարապետյանին կալանավորել. եկեղեցի, քաղաքականություն, ներդրումային ռիսկեր
«Չուլանացված» եկեղեցիներից մինչև կաթողիկոսի փոփոխության կոչ․ ի՞նչ օրակարգ է փորձում պարտադրել Փաշինյան
