«Հայ ազգային կոնգրեսը» պահանջել է դադարեցնել «Հայաստանի էլեկտրական ցանցեր» (ՀԷՑ) ընկերության պետականացման «ապօրինի գործընթացը» և վերականգնել արդարությունը։
««Հայ ազգային կոնգրես»-ը խստորեն դատապարտում է ՀՀ իշխանությունների կողմից ՀԷՑ-ի պետականացման գործընթացը, որը կոպտորեն ոտնահարում է սեփականության իրավունքը, խախտում է օրենքի գերակայության սկզբունքները և բացահայտ քաղաքական բռնաճնշումների ակնհայտ դրսևորում է»,- ասվում է կուսակցության հայտարարության մեջ։
Նշվում է, որ ՀԷՑ-ի պետականացումը, որը կատարվում է առանց սեփականատերերի հետ բանակցությունների, արդար փոխհատուցման և օրենքով սահմանված ընթացակարգերի պահպանման, խախտում է ՀՀ սահմանադրության 60-րդ հոդվածը, որը երաշխավորում է սեփականության անձեռնմխելիությունը։
ՀԱԿ-ը շեշտել է, որ իշխանությունների ընդունած օրենսդրական փոփոխությունները չեն համապատասխանում միջազգային իրավունքի նորմերին, մասնավորապես՝ ՀՀ-ի և ՌԴ-ի միջև ներդրումների պաշտպանության մասին համաձայնագրին։ Սա, ըստ քաղաքական ուժի, «ոչ միայն սպառնում է ՀԷՑ-ի սեփականատեր «Տաշիր» ընկերության օրինական շահերին, այլև խարխլում է» Հայաստանի ներդրումային միջավայրի վստահելիությունը։
Հայտարարության մեջ նաև նշվում է, որ իշխանությունների կողմից ՀԷՑ-ի սեփականատեր Սամվել Կարապետյանի դեմ քաղաքական բռնաճնշումների իրական պատճառը Հայ Առաքելական եկեղեցու նկատմամբ նրա ցուցաբերած աջակցությունն է, իսկ մեղադրանքն առաջադրելու համար առիթ է հանդիսացել հրապարակային հայտարարություն, որն անօրինական որևէ դրույթ չի պարունակում։
Կոնգրեսն իրավապահ մարմիններին և դատական համակարգին կոչ է արել անհապաղ վերանայել ՀԷՑ-ի պետականացման գործընթացը և ապահովել սեփականության իրավունքի պաշտպանությունը։ Կուսակցությունը ՀՀ քաղաքացիներին և քաղաքացիական հասարակությանը հորդորել է միանալ սեփականության իրավունքի, օրենքի գերակայության, խոսքի և կրոնական ազատությունների պաշտպանության պայքարին։
Քննչական կոմիտեն հուլիսի 4-ին Armenia Today-ին տեղեկացրել էր, որ ընկերության գրասենյակում կատարված խուզարկություններից հետո հարուցված գործի շրջանակում կալանավորվածների թիվը հասել է չորսի։ Հուլիսի 8-ին իրավապահները քննչական գործողություններ էին իրականացրել ՀԷՑ-ում և ընկերության տնօրենների խորհրդի նախագահ Նարեկ Կարապետյանի տանը։
ՀՀ Հանրային ծառայությունների կարգավորող հանձնաժողովը մերժել էր «ՀԷՑ» ՓԲԸ-ի ներկայացրած 2018-2034 թվականների ներդրումային ծրագրի 2025 թվականի մասով փոփոխությունները։ ՀՀ նախագահ Վահագն Խաչատուրյանը հուլիսի 8-ին ստորագրել էր ընկերության պետականացմանը, ըստ էության, միտված օրենքները։
Կարդացեք նաև՝
«Պայքար՝ մեր ձևով». Երևանում հավաք ու երթ է անցկացվել՝ ի աջակցություն Սամվել Կարապետյանի
