Դատարանը բավարարել է «Տաշիր գրուպ»-ին առնչվող քրեական վարույթով ևս 2 անձի կալանավորելու միջնորդությունը, Armenia Today-ին հայտնել է Քննչական կոմիտեի խոսնակ Կիմա Ավդալյանը։
Ավդալյանն Armenia Today-ին տեղեկացրել է, որ վարույթով, ընդհանուր առմամբ, կալանավորված 4 անձ կա, որոնց նկատմամբ հարուցվել է հանրային քրեական հետապնդում՝ Քրեական օրենսգրքի 296-րդ հոդվածի 3-րդ մասի 3-րդ կետով (առանձնապես խոշոր չափերով փողերի լվացում, առավելագույն պատիժն ազատազրկում՝ 12 տարի ժամկետով-խմբ․):
Հուլիսի 3-ին ՔԿ խոսնակը տեղեկացրել էր, որ քրեական վարույթով 2 անձ է կալանավորվել, և դատարանը քննում է վերոնշյալ մյուս 2 անձի նկատմամբ կալանքը որպես խափանման միջոց կիրառելու միջնորդությունը։
Հունիսի 19-ին դատարանը երկու ամսով կալանավորել էր «Տաշիր» ընկերությունների խմբի նախագահ Սամվել Կարապետյանին իշխանությունը զավթելու կոչեր անելու մեղադրանքով, երբ նա քննադատել էր Ամենայն Հայոց կաթողիկոսի և հոգևորականների դեմ Հայաստանի իշխանությունների արշավը: Փաշինյանը խիստ էր արձագանքել Կարապետյանի հայտարարությանը: Գործարարը չի ընդունում մեղադրանքը և մտադիր է բողոքարկել այն եվրոպական դատարանում:
Կարապետյանի ընտանիքը հունիսի 30-ին ՀՀ պետական մարմիններին պաշտոնապես ծանուցել էր ներդրումային վեճ սկսելու մասին:
Armenia Today-ը հուլիսի 2-ին հայտնել էր, որ իրավապահները խուզարկություններ են իրականացնում «Տաշիր գրուպի» գլխավոր գրասենյակում։ ՔԿ-ն ավելի ուշ Armenia Today-ին տեղեկացրել էր, որ խուզարկությունների հիմքում «առանձնապես խոշոր չափերով փողերի լվացման և առանձնապես խոշոր չափերով հարկերը, տուրքերը կամ այլ վճարներ չվճարելու հատկանիշներով նախաձեռնված քրեական վարույթի նախաքննությունն է»։
Կարդացեք նաև՝
Ինչո՞ւ են Սամվել Կարապետյանին կալանավորել. եկեղեցի, քաղաքականություն, ներդրումային ռիսկեր
«Չուլանացված» եկեղեցիներից մինչև կաթողիկոսի փոփոխության կոչ․ ի՞նչ օրակարգ է փորձում պարտադրել Փաշինյանը
