Գործարար և բարերար Սամվել Կարապետյանի պաշտպանության խորհուրդը հայտարարել է նրան վերագրվող գործում քաղաքական հետապնդման առկայության մասին, ասվում է խորհրդի հայտարարության մեջ:
Մասնավորապես, ըստ պաշտպանական խորհրդի, քաղաքական հետապնդման միջազգային չափանիշները հաստատվում են այն փաստով, որ «իշխանությունը զավթելու հրապարակային կոչի» մեղադրանքը կառուցվում է եկեղեցու պաշտպանությանն ուղղված հայտարարության հիման վրա, որը հասցեագրված չէ մարդկանց կոնկրետ շրջանակի կամ հասարակության: Նաև միջազգային չափանիշներով քաղաքական հետապնդման ակնհայտ նշան է, ըստ խորհրդի այն, որ կալանավորմանը զուգահեռ Կարապետյանի դեմ «ֆեյսբուքյան արդարադատության նախապատրաստում ու իրականացում կա»։
Պաշտպանական խորհուրդն ընդգծել է, որ բարերարին առաջադրված մեղադրանքը որևէ առնչություն չունի Քրեական օրենսգրքի և քրեական իրավունքի հետ, և Կարապետյանին ակնհայտ ապօրինի ձերբակալել են մասնագիտական հանրությանն անհայտ դատավորի որոշմամբ: Բացի այդ, պաշտպանները հայտարարել են, որ գործարարի խուզարկության և կալանավորման որոշումները նույնպես կայացվել են դատավորի կողմից, որը մասնագիտական հանրությանն անհայտ է:
Փաստաբանական խումբը հիշեցրել է, որ հունիսի 19-ին Կարապետյանին կալանավորելու որոշումը բողոքարկել է Վերաքննիչ քրեական դատարանում, բողոքարկել են խուզարկության և ձերբակալման ակնհայտ ապօրինի որոշումները:
Կարապետյանը հունիսի 17-ին մեկնաբանել էր Հայ Առաքելական եկեղեցու դեմ Հայաստանի իշխանությունների հայտարարությունները, որից հետո Ներքին գործերի նախարարության հատուկ նշանակության ստորաբաժանումները խուզարկություններ էին սկսել «Տաշիր» ընկերությունների խմբի նախագահի տանը՝ Երևանում։ Վարչապետը խիստ էր արձագանքել Կարապետյանի հայտարարությանը:
ՆԳՆ-ից Armenia Today-ին մեկնաբանել էին, որ Կարապետյանի առանձնատան մոտ «մի խումբ անձինք բերման են ենթարկվել, իրականացվում են օպերատիվ գործողություններ»։ Խուզարկության մեկնարկից մոտ ութ ժամ անց՝ գիշերը ժամը երեքին, Սամվել Կարապետյանը ոստիկանների ուղեկցությամբ դուրս էր եկել իր առանձնատնից և տեղափոխվել ՆԳՆ կազմակերպված հանցագործությունների դեմ պայքարի գլխավոր վարչություն, այնուհետև՝ Քննչական կոմիտե:
Ավելի ուշ ՔԿ-ն Armenia Today-ին հայտնել էր իշխանությունը զավթելու կոչեր անելու մեղադրանքով Կարապետյանին կալանավորելու միջնորդության մասին։ Ինքը՝ գործարարը, չի ընդունում մեղադրանքը և մտադիր է բողոքարկել այն բոլոր ատյաններում։ Կարապետյանի մամուլի ծառայությունն այս մեղադրանքներն անվանել էր ակնհայտ վախեցնելու և բռնաճշման փորձ։
