Ոստիկանությունը պարզել է ապրիլի 19-ին Երևանում սպանված անչափահաս տղայի և վիրավորների ինքնությունը, հայտնել է Shamshyan.com-ը՝ հղում անելով իր աղբյուրին։
Ըստ կայքի՝ պարզվել է, որ մահացածը Երևանի բնակիչ 16-ամյա Բենավ Դավթյանն էր, իսկ վիրավորները, ովքեր տեղափոխվել էին «Ուիգմոր» բժշկական կենտրոն, 16-ամյա Տիգրան Լ.-ն և 19-ամյա Սողոմոն Լ.-ն:
Տիգրան Լ.-ն հիվանդանոց էր տեղափոխվել «պոլիտրավմա» ախտորոշմամբ, իսկ Սողոմոն Լ.-ն՝ «պոլիտրավմա և ցնցում» ախտորոշմամբ, նրանք հարազատ եղբայրներ են, հայտնել է լրատվականը։
Ոստիկանությունը հայտնաբերել է ենթադրյալ կասկածյալներին, տեղափոխել քրեական ոստիկանություն, որտեղից էլ ներկայացվել են Քանաքեռ-Զեյթուն վարչական շրջանի քննչական բաժին:
ՆԳՆ մամուլի խոսնակ Նարեկ Սարգսյանն Armenia Today-ին հայտնեց, որ գործը բացահայտված է, գործով ձերբակալվել է մեկ կասկածյալ։
Ապրիլի 19-ին հայտնել էինք, որ Երևանում 16-ամյա տղայի են սպանել, կա երկու վիրավոր, որոնց տեղափոխել էին բժշկական կենտրոն։
