Փետրվարի 19-ին վարչապետ Նիկոլ Փաշինյանը դիմելով քաղաքացիներին՝ հայտարարել էր Հայաստանի նոր Սահմանադրության ընդունման համար համապետական հանրաքվե անցկացնելու անհրաժեշտության մասին։ Փաշինյանի խոսքով՝ գործող հիմնական օրենքի ընդունման համար անցկացված բոլոր նախորդ հանրաքվեները «գոնե հանրային ընկալման մեջ ունեն լեգիտիմության լուրջ պակաս»։
Armenia Today-ը հարցում է անցկացրել երևանցիների շրջանում՝ պարզելու նրանց վերաբերմունքը հանրաքվեի վերաբերյալ վարչապետի նախաձեռնությանը, ինչպես նաև հասկանալու նպատակով, թե նրանք մտադի՞ր են մասնակցել հանրաքվեին և ինչպե՞ս են վերաբերվում Անկախության հռչակագրի հղումը Սահմանադրության տեքստից հնարավոր բացառմանը։
Հարցվածների մեծ մասը դեմ է արտահայտվել Սահմանադրության փոփոխության գաղափարին։ Գրեթե բոլոր հարցվածները նշել են, որ չեն մասնակցելու նոր փաստաթղթի ընդունման հանրաքվեին կամ մասնակցելու են դրան՝ փոփոխություններին դեմ քվեարկելու համար։
Հարցվածներից մեկը խոստովանել է, որ չի հասկանում, թե իշխանություններն ինչո՞ւ պետք փոխեն երկրի հիմնարար օրենքը։
«Ի՞նչ է փոխելու Սահմանադրության փոփոխությունը։ Ինչպես կար, այնպես էլ մնալու է։ Հետևաբար, չեմ մասնակցի հանրաքվեին»,- բացատրել է կինը։
Մեկ այլ հարցված դեմ է արտահայտվել Սահմանադրության փոփոխությանը։ Նրա խոսքով՝ յուրաքանչյուր ղեկավար Սահմանադրությունը հարմարեցնում է իրեն։
Մեկ այլ հարցվողի կարծիքով՝ իշխանությունները ծրագրում են փոխել Սահմանադրությունն ինչ-որ թաքնված շարժառիթով։ Նա ասել է, որ կմասնակցի հանրաքվեին՝ կառավարության ղեկավարի առաջարկած նախաձեռնությունը մերժելու համար։
«Սա հիմարություն է, մենք արդեն ունենք Սահմանադրություն, և նորի կարիքը չունենք։ Իշխանությունները, հավանաբար, փորձում են ինչ-որ հարցեր լուծել հանրաքվեի միջոցով»,- ասել է կինը՝ հիշեցնելով, որ Փաշինյանն ընտրվել է գործող Սահմանադրությամբ։
Հարցման մասնակից երիտասարդը բացասաբար է արտահայտվել նաև վարչապետի նախաձեռնության մասին։ Նրա կարծիքով՝ այս գաղափարը պատկանում է Ադրբեջանի ղեկավարությանը։
«Շատ վատ եմ վերաբերվում Փաշինյանի նախաձեռնությանը։ Նախ այն պատճառով, որ հանրաքվե անցկացնելու պահանջն ի սկզբանե պատկանում էր ոչ թե Հայաստանի փաստացի ղեկավարներին, այլ Ադրբեջանի իշխանություններին։ Կարծում եմ՝ կմասնակցեմ հանրաքվեին և դեմ կքվեարկեմ»,- եզրափակել է նա։
Մանրամասները՝ տեսանյութում։
