Արցախից բռնի տեղահանվածների բնակարանային ապահովման ծրագրի նպատակով Հայաստանն Ասիական զարգացման բանկից (ԱԶԲ) 250 մլն դոլար վարկ կվերցնի։ ՀՀ կառավարությունը Հայաստանի և ԱԶԲ-ի վարկային համաձայնագրի նախագծին հավանություն է տվել հոկտեմբերի 30-ի նիստում։
Նախագծով նախատեսվում է, որ պետությունը վարկը կարող է մարել 27 տարվա մընթացքում՝ 10 տարվա արտոնյալ ժամանակահատվածով։ Վարկի օգտագործման վերջնաժամկետը սահմանված է 2030-ի դեկտեմբերի 31-ը, իսկ մայր գումարի մարումները կմեկնարկեն 2035-ի դեկտեմբերից։
Նախարարությունից նշել են, որ ծրագիրը նպատակ ունի բարելավել տեղահանված ընտանիքների կենսապայմաններն ու ապահովել երկարաժամկետ լուծումներ։
ԱԺ-ում 2026 թվականի պետական բյուջեի նախնական քննարկմանն ավելի ուշ սոցապնախարար Արսեն Թորոսյանը հայտնել է, որ հոկտեմբերի 30-ի դրությամբ՝ տեղահանված 3240 ընտանիք բնակարանային ծրագրով հավաստագիր է ստացել, որոնցից իրացվել է (բնակարան, տուն են գնել կամ գործող վարկ են մարել-խմբ․) 1210-ը։
Armenia Today-ին նախարարությունից ավելի վաղ հայտնել էին, որ հոկտեմբերի 1-ի դրությամբ՝ ծրագրի շրջանակում հավաստագիր ստացած 1044 ընտանիքից քանիսն է իրացրել այն, քանիսն է բնակարան ու տուն գնել։
2023 թվականի սեպտեմբերի 19-ին Ադրբեջանը հարձակվել էր Արցախի վրա։ Ռազմական գործողությունների ավարտից հետո Արցախի ամբողջ բնակչությունը բռնի տեղահանվել էր։ Արցախից բռնի տեղահանված 100 632 քաղաքացի էր հասել ՀՀ։
Կարդացեք նաև՝
Արցախցիներն ինչպե՞ս կարող են օգտվել բնակարան ձեռք բերելու պետական աջակցությունից
«Երկու տարի առանց Արցախի». սեպտեմբերի 19-ը հայտարարվել է Բռնի տեղահանության և պահանջատիրության օր
Բարձր հարկեր և աջակցության բացակայություն. ի՞նչ դժվարություններ ունի արցախյան բիզնեսը
Արցախցիների համար պետական ծրագրերը նվազում են, Սամվել Կարապետյանինը՝ շարունակվում․ «Մեր ձևով» շարժման անդամ
