ՀԷՑ-ի պետականացումը մասնավոր բիզնեսի խլում չէ, օրենսդրությամբ բոլոր հիմքերը սահմանված են, լրագրողներին հայտնել է ՀՀ էկոնոմիկայի նախարար Գևորգ Պապոյանը։ Ըստ նրա՝ կառավարությունը միայն ՀՀ օրենսդրությամբ սահմանված դեպքերի իրացումն է ապահովելու։
«Բազմաթիվ օրենքներ ունենք, որոնք ենթադրում են պարտավորություն պետության, մասնավորի, մարդու, քաղաքացու նկատմամբ։ Մենք չենք կարող մեկ մարդու շահը գերադասել հազարավոր, հարյուր հազարավոր, միլիոնավոր մարդկանց շահերից»,- նշել է նախարարը։
Պապոյանի խոսքով՝ չի կարելի մեկ մարդու ասել՝ դու ինչ ուզես կարող ես անել, իսկ հազարավոր տնտեսվարողներ, բիզնեսներ, հարյուր միլիոնավոր դոլարներ կորցնեն, մնան առանց լույսի, իսկ պետական կառավարման համակարգը պարալիզացվի։ Ըստ նրա, երեկ՝ հունիսի 25-ին, Էկոնոմիկայի նախարարությունում կես ժամը մեկ լույսերն անջատվել-միացել են։
«Գործարարներից մեկից տեղեկություն եմ ստացել, որը նոր տեխնոլոգիաներ է գնել և պարբերաբար ՀԷՑ անջատումների հետևանքով դրանք փչացել են, որովհետև ոչ մի ճապոնացի չի կարող պատկերացնել, որ օրը 5 անգամ կարող է լույսն անջատվել-միանալ»,- նշել է նախարարը։
ՀԷՑ սեփականատեր Սամվել Կարապետյանի շուրջ գործողությունների ֆոնին՝ վարչապետ Նիկոլ Փաշինյանը հունիսի 18-ին հայտարարել էր, թե հասունացել է գործարարին պատկանող ՀԷՑ-ն ազգայնացնելու պահը:
Կարապետյանը, ում նկատմամբ իշխանությունների կողմից Հայ Առաքելական եկեղեցու արշավը քննադատելուց հետո ուժայինները գործողություններ էին սկսել, ավելի ուշ՝ նախքան ոստիկանություն տեղափոխվելը, հայտարարել էր, որ «շարունակելու է եկեղեցու, ժողովրդի կողքին լինել և թքած ունի ցանկացած ՀԷՑ-երի վրա»:
Փաշինյանն այս խոսքերը ևս հետագայում մեկնաբանել էր և եզրակացրել, թե «այսինքն՝ այս մարդիկ ՀԷՑ-ն իրենցը չեն էլ համարել և թքած ունեն այդ ռազմավարական նշանակության հիմնարկի, նրա սպառողների ու աշխատակիցների վրա»:
Ավելի ուշ կառավարության ղեկավարն ԱԺ-ում՝ ճեպազրույցի ժամանակ, հայտարարել էր, որ մեկ ամիս առաջ գործադիրի համապատասխան անդամներին ՀԷՑ-ի հետ կապված հանձնարարական էր տվել նախապատրաստելու կա՛մ վնասի փոխհատուցման ծրագիր քաղաքացիներին, կա՛մ ընկերությունն ազգայնացնելու, քանի որ մարզերում ՀԷՑ-ի հետ կապված խնդիրներ էր արձանագրել։ Փաշինյանը նաև ՀԷՑ-ի անջատումների մեջ երկրի ներսում հասարակական դժգոհություն հրահրելու նպատակ էր տեսել։
Նա հայտարարել էր, որ «Քաղաքացիական պայմանագիր» խմբակցությունը ՀԷՑ-ն ազգայնացնելու նախագիծ է ներկայացրել ԱԺ։
«Տաշիր» ընկերությունների խումբը ՀԷՑ-ի կառավարման պարտականությունն ամբողջությամբ իր վրա էր վերցրել 2015-ին, երբ ընկերությունն «Ինտեր ՌԱՕ»-ի հետ պայմանագիր էր ստորագրել ՀՀ էլեկտրաէներգետիկ ակտիվների առուվաճառքի վերաբերյալ։
Կարդացեք նաև
Սամվել Կարապետյանն արձագանքել է ՀԷՑ-ի բաժնետոմսերն ստանալու իշխանությունների ծրագրերի մասին լուրերին
