Հայաստանի պարի պետական անսամբլը նշում է հիմնադրման 65-ամյակը։ Ժողովրդական երաժշտության և պարի ազգային կենտրոնը դեկտեմբերի 28-ին, ժամը 19:00-ին, Օպերայի և բալետի ազգային ակադեմիական թատրոնում կկազմակերպի հոբելյանին նվիրված համերգային երեկո։
65 տարիների լավագույն բեմադրությունները դեկտեմբերի 28-ին կներկայացվեն Ալ․ Սպենդիարյանի անվան օպերային և բալետի ազգային ակադեմիական թատրոնի բեմում։ Կկատարվեն լավագույն համարները՝ պատմություն դարձած «Բերդ»-ը, «Սարդարապատ»-ը, «Էնզելի»-ն, «Կակաչներ»-ը։ 65 տարիների լավագույն բեմադրությունների կողքին կլինեն նաև նոր համարներ։
Կազմակերպիչները խոստանում են դինամիկ և արդի համերգային ծրագրիր՝ թե՛ ժանրային իմաստով, թե՛ նաև տարբեր տարիների անսամբլի անդամ եղած արտիստների մասով։
Համերգային այս տոնի ռեժիսորը ՀՀ արվեստի վաստակավոր գործիչ Արամ Սուքիասյանն է։ Երաժշտական մասի ղեկավարը՝ Հայկ Գրիգորյանը։ Բալետմայստերն Աննա Քալաշյանն է, գլխավոր բալետմայստերը՝ Ասատուր Քալաշյանը։
ՀՀ ԿԳՄՍ նախարարությունը 28 միլիոն դրամ է հատկացրել Ժողովրդական երաժշտության և պարի ազգային կենտրոնին՝ Հայաստանի պարի պետական անսամբլի համար բեմական հագուստներ և աքսեսուարներ ձեռք բերելու նպատակով: Այդ հագուստներն առաջին անգամ կցուցադրվեն հենց հոբելյանական երեկոյի ընթացքում։
