Ազգային ժողովի պետական-իրավական հարցերի մշտական հանձնաժողովում «Քաղաքացիական պայմանագրի» պատգամավորները դեմ են քվեարկել իրենց թիմակից Անդրանիկ Քոչարյանի վարքագիծը քննելու ընդդիմադիր խմբակցությունների առաջարկին։
«Հայաստան»-ի և «Պատիվ ունեմ»-ի նախաձեռնությունը պայմանավորված էր լրագրող Հռիփսիմե Ջեբեջյանի նկատմամբ Քոչարյանի դրսևորած վերաբերմունքի հետ։
Մարտի 20-ի ճեպազրույցի ժամանակ Քոչարյանը Ջեբեջյանից պահանջել էր հեռու կանգնել և «մաքրել շուրթերը»։ Մարտի 26-ին Փաշինյանին էին փոխանցել պատգամավորական էթիկայի հանձնաժողով ձևավորելու պահանջով նամակ, որն ստորագրել էր 161 լրագրող։ Հայաստանի ժուռնալիստների միությունը դատապարտել է Ազգային ժողովում լրագրողների ակցիան բռնությամբ ընդհատելը։
Մամուլը գրել էր, որ լրագրողի նկատմամբ իր կոպիտ վերաբերմունքի քննադատությունից հետո Քոչարյանը մեկուսացել է ՔՊ գործընկերներից։
