ՀՀ պաշտպանության նախարարի առաջին տեղակալ, ԶՈւ ԳՇ պետ, գեներալ-լեյտենանտ Էդվարդ Ասրյանը Հունաստանի ազգային պաշտպանության նախարար Նիկոլաոս Դենդիասի հետ քննարկել է պաշտպանության բնագավառում համագործակցությանը վերաբերող հարցեր, հայտնում է ՀՀ ՊՆ մամուլի ծառայությունը։
Նշվում է, որ Ասրյանը ներկայացրել է ՀՀ զինված ուժերում իրականացվող բարեփոխումների ընթացքը։ Դենդիասն իր պատրաստակամությունն է հայտնել աջակցելու ՀՀ ԶՈւ բարեփոխումների իրագործմանը։ Կողմերն անդրադարձել են նաև տարածաշրջանային անվտանգությանն առնչվող հարցերի։
2024 թվականի դեկտեմբերին Հայաստանը, Կիպոսն ու Հունաստանը ստորագրել էին պաշտպանության համագործակցության 2025-ի ծրագրերը։ 2024 թվականի հուլիսին Հայաստանի ԱԺ-ն վավերացրել էր Հունաստանի հետ ռազմատեխնիկական համագործակցության ընդլայնման համաձայնագիրը։
Ռազմատեխնիկական համագործակցության մասին համաձայնագիրը Հայաստանի և Հունաստանի պաշտպանության նախարարներ Սուրեն Պապիկյանն ու Դենդիասն ստորագրել էին 2023 թվականի դեկտեմբերի 14-ին՝ Աթենքում։ Դենդիասը մարտին հայտարարել էր Հայաստանի, Հունաստանի, Ֆրանսիայի և Հնդկաստանի միջև պաշտպանության ոլորտում քառակողմ համագործակցության մասին:
