ՀՀ երկրորդ նախագահ Ռոբերտ Քոչարյանը երկրորդ դատական հայցն է ներկայացրել ԱԺ նախագահ Ալեն Սիմոնյանի դեմ՝ պահանջելով հերքել և ներողություն խնդրել իր հասցեին արված արտահայտությունների ու տեղեկությունների համար, տեղեկանում ենք Դատական տեղեկատվական համակարգի Datalex.am կայքից։
Քոչարյանը Facebook-ում իր վերաբերյալ Սիմոնյանի գրառումները «կեղծ, ակնհայտ անհիմն, զրպարտչական բնույթի» է անվանել։
Նախկին նախագահը դատարանից պահանջել է ԱԺ խոսնակին պարտավորեցնել Facebook-ի իր էջում հրապարակային տեքստով ներողություն խնդրել իրենից՝ նշելով, որ «զղջում է վիրավորական արտահայտությունների համար, որով նպատակ է ունեցել արատավորել Քոչարյանի պատիվն ու արժանապատվությունը»։
Հունիսի 14-ին Քոչարյանը դատական հայցեր էր ներկայացրել վարչապետ Նիկոլ Փաշինյանի և Սիմոնյանի նկատմամբ։ Փաշինյանի դեմ ներկայացված հայցով Քոչարյանը պահանջել էր հերքել «Դատարանի որոշմամբ արձանագրված է՝ Քոչարյանը կաշառակեր է» տեղեկությունը։ Սիմոնյանից պահանջել էր ներողություն խնդրել «շպիոն» և «անգրագետ» արտահայտությունների համար։
