«Տաշիր» ընկերությունների խմբի առաջին փոխնախագահ, «Հայաստանի էլեկտրական ցանցեր» փակ բաժնետիրական ընկերության տնօրենների խորհրդի նախագահ Նարեկ Կարապետյանն անդրադարձել է ՀԷՑ-ը, իշխանությունների խոսքերով, պետականացնելու ռիսկերին։
Կարապետյանը նշել է, որ պետությունը լավ կառավարիչ չէ՝ ընդգծելով էներգետիկ համակարգում կադրային քաղաքականության բացակայության մասին։
«Էներգետիկայի փոխնախարարի հաստիք կա, բայց փոխնախարար չկա։ Եթե չենք կարողանում ամբողջ էներգետիկ համակարգի համար պատասխանատու գտնել, ինչպե՞ս եք գտնելու կադր՝ կառավարելու այնպիսի մեծ ընկերությունը, ինչպիսին ՀԷՑ-ն է»,- ընգծել է Կարապետյանը։
Կարապետյանը շեշտել է, որ իշխանությունների մտադրության իրականացման դեպքում կարճաժամկետ առումով հնարավոր կլինի պահել էլեկտրաէներգիայի գործող սակագինը, բայց երկարաժամկետ տեսանկյունից խնդիրներ կլինեն։
«Սակագինը կարճաժամկետ հնարավոր կլինի պահել, քանի որ մենք այդքան աշխատանք ենք կատարել, բայց երկարաժմկետ առումով խնդիրներ կունենանք․ առաջինը՝ կլինեն միջազգային արբիտրաժներով եկած տույժեր, որոնք պետությունը ստիպված կլինի վճարել, երկրորդ՝ միջազգային մեծ բանկերի ֆինանսավորման դադարեցում, քանի որ դրանք ոչ մասնավորի հետ չեն աշխատի՝ հաշվի առնելով պետական համակարգի թուլությունները, երրորդ՝ գիտենք, թե ինչպես են աշխատում պետական կառույցները, ինչի արդյունքում կունենանք խնդիրներ»,- մանրամասնել է Կարապետյանը։
Նա նաև հայտարարել է, որ այն լարերը, որոն Երևանի կենտրոնում են, ՀԷՑ-ինը չեն, ՀԷՑ-ի լարերը հողի տակով են անցնում։
«Եթե դուք տեսնում եք վթար, երբ շատ մեծ քանակի տարածք է հոսանքազրկվել, ասենք Երևանի 3 թաղամաս, դա չի կարող լինել ՀԷՑ-ի պատասխանատվության տակ, որովհետև ՀԷՑ-ի ենթակայանները սնուցում են փոքր թաղամասերը։ Մեծ վթարները «Բարձրավոլտտ էլեկտրական ցանցերի» պատասխանատվության տիրույթում են։ Գիտեմ, որ շատ դժվար է տարբերել, բայց եթե ամբողջ շրջանում հոսանքազրկման խնդիր կա, ուրեմն՝ ԲԷՑ-ից է, եթե հոսանքազրկումը մի քանի շենքում է, ուրեմն՝ ՀԷՑ-ում է խնդիրը»,- պարզաբանել է Կարապետյանը։
ՀԷՑ-ի սեփականատեր, «Տաշիր» ընկերությունների խմբի նախագահ Սամվել Կարապետյանի շուրջ գործողությունների ֆոնին՝ վարչապետ Նիկոլ Փաշինյանը հունիսի 18-ին հայտարարել էր, թե հասունացել է գործարարին պատկանող ՀԷՑ-ն ազգայնացնելու պահը: «Քաղաքացիական պայմանագիր» խմբակցությունը ՀԷՑ-ն պետականացնելու նախագիծ էր ներկայացրել ԱԺ, որը հուլիսի 3-ին ամբողջությամբ ընդունել էր։
«Տաշիր» ընկերությունների խումբը ՀԷՑ-ի կառավարման պարտականությունն ամբողջությամբ իր վրա էր վերցրել 2015-ին, երբ ընկերությունն «Ինտեր ՌԱՕ»-ի հետ պայմանագիր էր ստորագրել ՀՀ էլեկտրաէներգետիկ ակտիվների առուվաճառքի վերաբերյալ։
Հունիսի 19-ին դատարանը երկու ամսով կալանավորել էր Կարապետյանին իշխանությունը զավթելու կոչեր անելու մեղադրանքով, երբ նա քննադատել էր Ամենայն Հայոց կաթողիկոսի և հոգևորականների դեմ Հայաստանի իշխանությունների արշավը: Փաշինյանը խիստ էր արձագանքել Կարապետյանի հայտարարությանը: Փաշինյանը խիստ էր արձագանքել Կարապետյանի հայտարարությանը: Գործարարը չի ընդունում մեղադրանքը և մտադիր է բողոքարկել այն եվրոպական դատարանում:
Կարդացեք նաև՝
Ինչո՞ւ են Սամվել Կարապետյանին կալանավորել. եկեղեցի, քաղաքականություն, ներդրումային ռիսկեր
«Չուլանացված» եկեղեցիներից մինչև կաթողիկոսի փոփոխության կոչ․ ի՞նչ օրակարգ է փորձում պարտադրել Փաշինյան
