Մինչև աշուն էկրան կբարձրանա սփյուռքի միջոցներով նկարահանվող խաղարկային վավերագրական «Լուսավորիչ» ֆիլմը, հայտնել է «Հրապարակ»-ը՝ հղում անելով ֆիլմի ստեղծագործական թիմում իր աղբյուրներին։
Ֆիլմը նկարահանվել է «Փյունիկ» ֆուտբոլային ակումբի նախկին սեփականատեր Արթուր Սողոմոնյանի աջակցությամբ և «Պարտնյոր ֆիլմ»-ի հետ համագործակցությամբ: Պրոդյուսերն է Տիգրան Մանասյանը, ռեժիսորը՝ Վագա Վարդանյանը:
Ըստ թերթի՝ ֆիլմում նկարագրված են Հայաստանում քրիստոնեության տարածման ժամանակաշրջանը, միջազգային քաղաքական իրավիճակը և այլ պատմական իրողություններ:
Լրատվականի տեղեկությամբ՝ ֆիլմի հիմնական նպատակը ռուսախոս շրջանակներում հայոց պատմության հանրայնացումն է, համացանցի ռուսալեզու տիրույթում հայկական մշակույթի քարոզն ու տարածումը:
Թերթը հիշեցրել է, որ նույն թիմի նկարահանած «Արտավազդ Երկրորդ. Հռոմի և Պարթևստանի միջև» ֆիլմը լայն արձագանք էր ստացել, և տեղեկացրել, որ ընթանում են ավելի խոշորամասշտաբ ֆիլմի ստեղծման աշխատանքներ` նվիրված Տիգրան Մեծի գահակալության տարիներին:
