Կուրսկի շրջանը Ուկրաինայի զինված ուժերից ազատագրելու գործողությունն ավարտվել է, ՌԴ նախագահ Վլադիմիր Պուտինը համապատասխան զեկույց է ստացել Գլխավոր շտաբի պետ Վալերի Գերասիմովից, «ՌԻԱ Նովոստիի» փոխանցմամբ՝ հայտնել է նախագահի մամուլի քարտուղար Դմիտրի Պեսկովը։
«Գերասիմովը գերագույն գլխավոր հրամանատար Պուտինին զեկուցել է Կուրսկի շրջանն ազատագրելու գործողության ավարտի մասին»,- ասել է նա։
2024թ. օգոստոսի 6-ի վաղ առավոտյան ուկրաինացի զինյալները մտել էին Կուրսկ։ Մարզը Ռուսաստանում սահմանակից է Բրյանսկին, Օրյոլին, Լիպեցկին, Վորոնեժին և Բելգորոդին, ինչպես նաև Ուկրաինայի Սումիի մարզին:
«Նրանց առաջխաղացումը կասեցվել էր։ Մարտի սկզբին ռուսական զորքերը սկսել էին լայնածավալ հարձակում և մի քանի օրվա ընթացքում ազատագրել շուրջ 1100 քառակուսի կիլոմետր տարածք»,- գրում է լրատվամիջոցը։
Նշվում է, որ Կուրսկի սահմանային գոտում մարտերի ընթացքում Ուկրաինայի զինված ուժերը կորցրել են առնվազն 75 հազար զինվոր և շուրջ 400 տանկ։
Փետրվարի 12-ին ՌԴ և ԱՄՆ առաջնորդների հեռախոսազրույցից հետո մեկնարկել էր ռուս-ուկրաինական հակամարտության կարգավորման գործընթացը:
Մեկ ամիս անց ԱՄՆ պետքարտուղար Մարկո Ռուբիոն Ռուսաստանին կոչ էր արել 30-օրյա հրադադար հաստատել Ուկրաինայում։ Մարտի 11-ին Կիևը համաձայնել էր ընդունել ժամանակավոր հրադադարի մասին Նահանգների առաջարկը: Մոսկվան համաձայնել էր ռազմական գործողությունները դադարեցնելու առաջարկներին այն պայմանով, որ դրանք պետք է հանգեցնեն երկարաժամկետ խաղաղության:
Ապրիլի 10-ին ՌԴ ԱԳՆ-ն հայտնել էր, որ Ռուսաստանը և ԱՄՆ-ն Ստամբուլում բանակցությունների ժամանակ համաձայնության են եկել մշակել «ճանապարհային քարտեզ»՝ ամերիկյան իշխանությունների կողմից բռնագրավված վեց ռուսական դիվանագիտական օբյեկտները վերադարձնելու համար։ Պետդեպարտամենտը Ստամբուլի բանակցությունները «կառուցողական էր որակել:
